តុលាការ ឥណ្ឌា សម្រេចកាត់ទោសប្រហារជីវិតបុរស ៤ នាក់ ដែលចាប់រំលោភ និងសម្លាប់និស្សិតពេទ្យម្នាក់អាយុ ២៣ ឆ្នាំ ម្នាក់ក្នុងរថយន្តក្រុងមួយគ្រឿង ក្នុងទីក្រុង ញូដេលី ជាឧក្រិដ្ឋកម្មដែលបង្កឲ្យមានបាតុកម្មទ្រង់ទ្រាយធំ និងនាំឲ្យរដ្ឋសភា ឥណ្ឌា ធ្វើវិសោធនកម្មច្បាប់តម្រូវឲ្យប្រហារជីវិតឧក្រិដ្ឋជនរំលោភផ្លូវភេទ ។
សូមរំឭកថា ក្នុងឆ្នាំ ២០១២ បុរសទាំង៥ នាក់ បានចាប់ជនរងគ្រោះចូលរថយន្តក្រុងឯកជនមួយគ្រឿង ហើយរំលោភផ្លូវភេទ រួចហើយពួកគេយកដែកចាក់ប្រដាប់ភេទរបស់ជនរងគ្រោះ ។ ក្រុមគ្រួសារបានបញ្ជូនជនរងគ្រោះទៅមន្ទីរពេទ្យប្រទេស សិង្ហបុរី ប៉ុន្តែនាងបានស្លាប់ដោយសាររបួសធ្ងន់ធ្ងរ ។ ចំណែកជនសង្ស័យទី ៥ បានចងកសម្លាប់ខ្លួនក្នុងគុក ក្នុងឆ្នាំ ២០១៣ មុនពេលបើកសវនាការ ។
ឧក្រិដ្ឋកម្មនោះប្រព្រឹត្តឡើងក្នុងឆ្នាំ ២០១២ ដោយតុលាការដំបូងបានកាត់ទោសប្រហារជីវិតបុរសទាំង ៤ នាក់ ដែលជាអ្នកប្រព្រឹត្ត ប៉ុន្តែមានការប្ដឹងឧទ្ធរណ៍រហូតដល់តុលាការកំពូលបានសម្រេចរក្សាទោសតាមតុលាការជាន់ទាប ដូច្នេះមានថា បុរសទាំង ៤ នាក់ នឹងត្រូវបានគេប្រហារជីវិតក្នុងពេលឆាប់ៗនេះ ។ ឪពុករបស់ជនរងគ្រោះនិយាយថា អ្នកទោសទាំង ៤ នាក់ គួរត្រូវបានព្យួរកក្នុងពេលឆាប់ ។ ម្ដាយរបស់នារីរងគ្រោះនិយាយថា ទីបំផុតយុត្តិធម៌ត្រូវបានតុលាការផ្ដល់ឲ្យសម្រាប់កូនស្រីរបស់គាត់ ។
