ក្រុមអ្នកតវ៉ាប្រឆាំងប្រធានាធិបតីជាប់ឆ្នោតថ្មីរបស់ប្រទេសប្រេស៊ីលប្រមាណជា ៣ម៉ឺន៥ពាន់នាក់ កំពុងពុះកញ្ជ្រោលនិងចលាចលយ៉ាងខ្លាំង រហូតឈានទៅដល់ការដុតបំផ្លាញអគារក្រសួងកសិកម្ម និងអគារក្រសួងផ្សេងៗទៀត ជាហេតុនាំឲ្យរដ្ឋាភិបាលលោក Michel Temer បង្ខំចិត្តបញ្ជាឲ្យដាក់ពង្រាយទ័ពជាច្រើននាក់បង្ក្រាបពួកគេ។
បើយោងតាមការចេញផ្សាយរបស់សារព័ត៌មាន RT នៅថ្ងៃព្រហស្បតិ៍ ទី២៥ ខែឧសភា ឆ្នាំ២០១៧នេះ រដ្ឋាភិបាលប្រេស៊ីលបានដាក់ពង្រាយទ័ពរាប់រយនាក់នៅជុំវិញទីក្រុងBrasiliaដើម្បីឆ្លើយតបទៅនឹងក្រុមអ្នកតវ៉ាប្រមាណជា ៣ម៉ឺន៥ពាន់នាក់ ដែលកំពុងចូលរួមធ្វើកុបកម្មប្រឆាំង ដោយពួកគេស្រែកទាមទារឲ្យប្រធានាធិបតីជាប់ឆ្នោតលោក Michel Temer ចុះចេញពីតំណែង ខណៈដែលរូបលោកមិនធ្វើការកំណែទម្រង់សេដ្ឋកិច្ចឡើងវិញ។