សិល្បៈ ៖ ជារឿងចាប់អារម្មណ៍ណាស់នៅពេលតារាសម្ដែង និងពិធីការិនី សុខ សោម៉ាវត្តី បានចេញវីដេអូស៊ីអារម្មណ៍ជាមួយគូស្នេហ៍ថ្មី កីឡាករបាល់ទាត់ លី វ៉ាហេត ព្រោះទំនាក់ទំនងស្នេហាអ្នកទាំងពីរបានធ្វើឲ្យអ្នកគាំទ្រចង់ដឹងចង់ឮមានរយៈពេលប្រមាណជិតឆ្នាំមកហើយ។ ពេលនេះខណៈពួកគេបាន Live វីដេអូស៊ីអារម្មណ៍តែពីរនាក់នៅក្នុងរថយន្តជាមួយគ្នា ធ្វើឲ្យមានទាំងអ្នកគាំទ្រ និងរិះគន់។\
វីដេអូនេះដ្បិតតែអ្នកទាំងពីរមិនបាននិយាយអ្វីស៊ីជម្រៅជុំវិញទំនាក់ទំនងពួកគេក្ដី ប៉ុន្តែតាមរយៈអត្ថន័យបទចម្រៀងដែលលោក លី វ៉ាហេត បានច្រៀងក្នុងពេល Live វីដេអូ រួមគ្នានោះ ក្រៅពីអ្នកទាំងពីរបង្ហាញឲ្យឃើញភាពផ្អែមល្ហែម ក៏បានរៀបរាប់ថា លោកបានស្រឡាញ់មនុស្សម្នាក់ជារបស់គេ លោកបន់ឲ្យគេបែកគ្នាឆាប់ៗ ។ អត្ថន័យក្នុងបទចម្រៀងនេះគឺមិនសុខពីររឿង សុខ សោម៉ាវត្តី និងរូបលោកនោះទេ ព្រោះអ្នកទាំងពីរបានបង្ហាញភាពស្និទ្ធស្នាលជាមួយគ្នាតាំងពីតារាស្រីរូបនេះមិនទាន់លែងប្ដីមកម្ល៉េះ ប៉ុន្តែរូបភាពនោះត្រូវបានគេគិតថា គ្រាន់តែជាសកម្មភាពសិល្បៈតែប៉ុណ្ណោះ។
ចម្ងល់ទាំងនេះហើយទើបធ្វើឲ្យមានមតិខ្លះគិតថា ទំនាក់ទំនងអ្នកសិល្បៈ និងអ្នកកីឡាអាចមានលក្ខណៈស៊ីជម្រៅតាំងពីមុន សុខ សោម៉ាវត្តី លែងប្ដីមកម្ល៉េះ ប៉ុន្តែការសន្និដ្ឋាននេះយើងមិនទាន់ទទួលបានការបញ្ជាក់ពី សុខ សោម៉ាវត្តី និង លី វ៉ាហេត នៅឡើយទេ ៕