រាជធានីភ្នំពេញ៖ កូនប្រុសតារាកំប្លែងនាយហុងដា រួមជាមួយមិត្តស្រី ត្រូវបានអាវុធរាជធានីភ្នំពេញ បញ្ជូនខ្លួនទៅសាលាដំបូងរាជធានីភ្នំពេញហើយនៅថ្ងៃទី១៥ ខែឧសភា ឆ្នាំ២០១៧នេះ ក្រោយពីបានឃាត់ខ្លួននៅក្រោយវិហារចាម ក្នុងខណ្ឌជ្រោយចង្វារ កាលពីថ្ងៃទី១២ ឧសភាកន្លងទៅ ហើយនៅរសៀលនេះ ជនសង្ស័យទាំងពីរ ត្រូវបានតំណាងអយ្យការ ចោទប្រកាន់ជាផ្លូវការ ពីឃាតកម្មសម្លាប់ម្តាយចុង។
បើតាមលោក ស៊ិន វីរៈ ព្រះរាជអាជ្ញារងអមសាលាដំបូងរាជធានីភ្នំពេញ បានបញ្ជាក់ថា កូនប្រុសនាយហុងដា ត្រូវចោទពីបទ ឃាតកម្មគិតទុកជាមុន យោងតាមមាត្រា២០០ នៃក្រមព្រហ្មទណ្ឌ ហើយសង្សារកូនប្រុសនាយហុងដា ត្រូវបានចោទពីបទ សមគំនិតក្នុងអំពើឃាតកម្មគិតទុកជាមុន តាមមាត្រា២៩ និងមាត្រា២០០នៃក្រមព្រហ្មទណ្ឌ ។បទល្មើសនេះបានកំណត់ការផ្ដន្ទាទោសដាក់ពន្ធនាគារអស់មួយជីវិត ។
តំណាងអយ្យការរូបនេះបន្ថែមថា បច្ចុប្បន្នជនត្រូវចោទឈ្មោះ ខា សុខខេង (កូននាយហុងដា)អាយុ១៨ឆ្នាំ និងស្រីស្នេហ៍ ឈ្មោះ នេត រស្មីកន្និការ អាយុ១៧ឆ្នាំ និងសំណុំរឿងរបស់ពួកគេ ត្រូវបានទៅដល់ដៃចៅក្រមស៊ើបសួរហើយ ដើម្បីបន្តនីតិវិធី ហើយនៅដំណាក់កាលនេះ ចៅក្រមស៊ើបសួរនឹងសម្រេចថាឃុំខ្លួនឬមិនឃុំខ្លួនជនត្រូវចោទទាំងពីរ។
សូមបញ្ជាក់ថា ប្រពន្ធក្រោយលោក ហុង ដា មានឈ្មោះ ស៊ឹម ចាន់ធី អាយុ១៩ ឆ្នាំនិងមានកូនត្រឹមអាយុ៦ខែនោះ ត្រូវបានគេសម្លាប់នឹងខ្សែឆ្នាំងអ៊ុតរឹតក នៅក្នុងបន្ទប់ខុនដូ មួយកំពុងសាងសង់ នៅជាន់ទី៥ ដែល ក្នុងភូមិតាឡី សង្កាត់ដង្កោ ខណ្ឌដង្កោ កាលពីថ្ងៃទី១១ ខែ ឧសភា ហើយការសម្លាប់នេះត្រូវបានគេដាក់ការសង្ស័យទៅកូនប្រុសប្រពន្ធដើមនាយហុងដា៕
