រដ្ឋាភិបាល ហ្វីលីពីន បានបដិសេធមិនទទួលយកជំនួយសហភាពអឺរ៉ុបជាប្រាក់ ២៧៨ លានដុល្លារអាមេរិក ដោយសារតែសហភាពអឺរ៉ុប នៅតែបន្តរិះគន់សង្គ្រាមប្រឆាំងថ្នាំញៀនរបស់លោកប្រធានាធិបតី រ៉ូទ្រីហ្គោ ឌូតឺតេ ជាយុទ្ធនាការបង្ក្រាបថ្នាំញៀនដែលនាំឲ្យមនុស្សស្លាប់រាប់ពាន់នាក់ ។
ឯកអគ្គរដ្ឋទូតសហភាពអឺរ៉ុបប្រចាំប្រទេស ហ្វីលីពីន លោក Franz Jessen បញ្ជាក់ក្នុងសេចក្ដីថ្លែងការណ៍ថា រដ្ឋាភិបាលទីក្រុង ម៉ានីល ពិតជាបានច្រានចោលជំនួយរបស់សហភាពអឺរ៉ុប ២៧៨ លានដុល្លារអាមេរិក ។ ប្រធានាធិបតី ហ្វីលីពីន តែងសម្ដែងការខឹងសម្បារចំពោះការរិះគន់សង្គ្រាមប្រឆាំងថ្នាំញៀន ធ្វើឡើងដោយសហភាពអឺរ៉ុប សហរដ្ឋអាមេរិក និងអង្គការសហប្រជាជាតិ ដោយលោក ឌូតឺតេ ប្រើពាក្យសម្ដីធ្ងន់ៗ ហើយជួនកាលប្រៀបធៀបសង្គ្រាមប្រឆាំងថ្នាំញៀនរបស់លោកថាប្រហាក់ប្រហែលនឹងការសម្លាប់រង្គាលរបស់មេដឹកនាំ ណាហ្ស៊ី អ៊ីត្លែ ។
ចាប់តាំងពីលោក ឌូតឺតេ ឡើងកាន់តំណែងជាប្រធានាធិបតីកាលពីខែ មិថុនា ឆ្នាំមុន ប៉ូលិសផ្ដល់របាយការណ៍ថា មនុស្សយ៉ាងតិច ២៧០០ នាក់ត្រូវបានសម្លាប់ ប៉ុន្តែអង្គការសិទ្ធិមនុស្សអះអាងថា អ្នកស្លាប់មានចំនួនរហូតដល់ ៨០០០ ពាន់នាក់ ។
ដោយសារតែសង្គ្រាមប្រឆាំងថ្នាំញៀន រដ្ឋាភិបាល ហ្វីលីពីន បានកាត់បន្ថយទំនាក់ទំនងជាមួយសម្ព័ន្ធមិត្តយូរអង្វែងរបស់ខ្លួនគឺ សហរដ្ឋអាមេរិក ព្រមទាំងភ្ជាប់ទំនាក់ទំនងជាមួយប្រទេស ចិន និង រុស្ស៊ី ក្រោយពីរដ្ឋាភិបាលទីក្រុង វ៉ាស៊ីនតោន មិនព្រមលក់អាវុធទៅឲ្យប្រទេស ហ្វីលីពីន ដោយសារតែមានការសម្លាប់មនុស្សក្រៅប្រព័ន្ធតុលាការច្រើនសន្ធឹកសន្ធាប់ ។
