រដ្ឋាភិបាល ថៃ អាចបិទមិនឲ្យក្រុមហ៊ុន Facebook ដំណើរការក្នុងប្រទេសតទៅទៀត ដោយសារតែក្រុមហ៊ុនបណ្ដាញសង្គមធំបំផុតមួយនេះ មិនព្រមលុបរូបភាពដែលចុះផ្សាយប្រមាថដល់មហាក្សត្រ ថៃ ចំនួន ១៣១ តាមការទាមទារ ដែលមានន័យថា អ្នកប្រើប្រាស់ Facebook ក្នុងប្រទេស ថៃ ប្រឈមនឹងការបាត់បង់សិទ្ធិប្រើប្រាស់ Facebook ទាំងស្រុង ប្រសិនបើរដ្ឋាភិបាល និងក្រុមហ៊ុនមិនអាចព្រមព្រៀងគ្នាបាន ។
ចំណែកប្រធានសមាគមក្រុមហ៊ុនផ្គត់ផ្គង់អ៊ីនធឺណិតក្នុងប្រទេសថៃ និយាយថា ក្រុមហ៊ុន Facebook គ្រាន់តែអនុវត្តតាមគោលនយោបាយរបស់ខ្លួនប៉ុណ្ណោះ ដោយត្រូវលុបអ្វីដែលត្រូវលុប ហើយអ្វីដែលមិនត្រូវលុប នឹងមិនលុបឡើយ ប្រសិនបើរកឃើញថា មិនបំពានដល់គោលនយោបាយរបស់ក្រុមហ៊ុន ។ Facebook មិនព្រមលុបចោលរូបភាព និងអត្ថបទដែលអ្នកប្រើប្រាស់ចុះផ្សាយបង្ហាញពីរូបភាពមានលក្ខណប្រមាថមហាក្សត្រជាច្រើនសន្លឹក ដូចជា រូបភាពដែលមហាក្សត្រ មហាវ៉ាជិរ៉ាឡុងកន ពាក់អាវអ៊ៀម បញ្ចេញរូបសាក់ពេញខ្លួន និងវីដេអូក្នុងពេលដែលព្រះអង្គចូលហាងទំនិញ មុនពេលបិតាសោយទិវង្គត ហើយអាជ្ញាធរ ថៃ បានស្នើឲ្យក្រុមហ៊ុន Facebook លុបវីដេអូនោះជាបន្ទាន់ ។
រដ្ឋាភិបាលបានទុកពេលវេលាមួយសប្ដាហ៍ដល់ក្រុមហ៊ុនឲ្យលុបរូបភាព និងវីដេអូទាំងនោះ ប៉ុន្តែពេលវេលាបានផុតកំណត់នៅថ្ងៃអង្គារនេះ ដូច្នេះរដ្ឋាភិបាល ថៃ កំពុងពិចារណាបិទមិនឲ្យមានការប្រើប្រាស់ Facebook ក្នុងប្រទេស ថៃ តទៅទៀត ។ ថៃ គឺជាប្រទេសដែលមានច្បាប់តឹងរ៉ឹងបំផុតចំពោះអ្នករិះគន់រាជវង្ស ដោយអ្នកដែលមានទោសពីបទប្រមាថមហាក្សត្រត្រូវជាប់ពន្ធនាគាររហូតដល់ ១៥ ឆ្នាំ ក្នុងនោះ មនុស្សជាង ១០០ នាក់ ត្រូវបានភ្នាក់ងាររដ្ឋាភិបាលរកឃើញថាបានបង្ហោះ និងចែករំលែកនូវរូបភាពដែលប្រមាថមហាក្សត្ររបស់ប្រទេស ថៃ ។
ប្រភពៈ cnbc
