យោងតាមសារព័ត៌មាន RT បានចុះផ្សាយនៅមុននេះបន្តិចថា សហរដ្ឋអាមេរិកកំពុងថ្កោលទោសយ៉ាងខ្លាំង ចំពោះកងកម្លាំងសន្តិសុខ រុស្ស៊ី រាប់ពាន់នាក់ ដែលបានបង្ក្រាបទៅលើហ្វូងបាតុករប្រមាណជា ៥ពាន់នាក់ និងចាប់ខ្លួនពួកគេជាង ១០០នាក់ ដែលតវ៉ាប្រឆាំងនឹងអំពើពុករលួយ នៅទីក្រុង ម៉ូស្គូ។ ទន្ទឹមគ្នានេះអាមេរិកថែមទាំងទាមទារឲ្យរដ្ឋាភិបាលប្រទេសមហាអំណាចមួយនេះ ធ្វើការដោះលែងពួកគេវិញទៀតផង។
អ្នកនាំពាក្យសេតវិមាន លោក សៀន ស្ពៃសឺ (Sean Spicer) បានលើកឡើងថា "អាមេរិកបានថ្កោលទោសរុស្ស៊ីយ៉ាងពេញទំហឹង ចំពោះការឃុំខ្លួនក្រុមបាតុកររាប់សិបនាក់ និងអំពាវនាវទៅកាន់រដ្ឋាភិបាលទីក្រុង ម៉ូស្គូ ឲ្យធ្វើការដោះលែងពួកគេវិញ ដោយនិយាយថា ទង្វើទាំងនោះជាការប្រឆាំងនឹងលទ្ធិប្រជាធិបតេយ្យនៅក្នុងប្រទេស"។
គួរបញ្ជាក់ផងដែរថា បាតុកម្មតវ៉ាដ៏ធំនេះបានផ្ទុះឡើង បន្ទាប់ពីអាជ្ញាធរ រុស្ស៊ី ចាប់ខ្លួនមេដឹកបក្សប្រឆាំង លោក Alexei Navalny ឃុំទុក និងថែមត្រូវបានតុលាការម្រេចកាត់ទោសរូបលោក ឲ្យជាប់ឃុំខ្លួនក្នុងរយៈពេលរហូតដល់ ៣០ថ្ងៃ ពីបទប្រមូលផ្ដុំបាតុកម្មតវ៉ាប្រឆាំងរដ្ឋាភិបាល។ យ៉ាងណាមិញការតវ៉ាខាងលើនេះ បានកើតឡើងតាំងពីថ្ងៃចន្ទម្សិលមិញមកម្ល៉េះ មកទល់ពេលនេះនៅពុំទាន់ស្ងាត់នៅឡើងទេ៕
