យោងតាមសេចក្ដីថ្លែងការណ៍ចេញពីសេតវិមានមានឲ្យដឹងថា រដ្ឋាភិបាល ស៊ីរី កំពុងរៀបចំផែនការវាយប្រហារដោយអាវុធគីមីម្ដងទៀតទៅលើក្រុមសកម្មយុទ្ធ ISIS ហើយបានអះអាងគម្រោងវាយប្រហារក្រោមការដឹកនាំដោយប្រធានាធិបតី លោកបាសា អាល់អាសាដ (Bashar al-Assad)។
ប្រភពដដែលបានបន្តថា យោធាអាមេរិកជឿជាក់លើផែនការវាយប្រហារអាវុធគីមីលើកនេះ គឺស្រដៀងគ្នាទៅនឹងការវាយប្រហារនៅក្នុងប្រទេស ស៊ីរី កាលពីថ្ងៃទី០៤ ខែមេសាកន្លងទៅ ដែលត្រូវបានរដ្ឋាភិបាលលោក បាសា អាល់អាសាដ ធ្វើការបដិសេធសកម្មភាពរបស់ខ្លួន។
ជុំវិញបញ្ហានេះប្រធានាធិបតី លោក ដូណាល់ត្រាំ បានលើកឡើងថា "ប្រសិនបើរដ្ឋាភិបាល ស៊ីរី បើកការវាយប្រហារដោយប្រើអាវុធគីមីលើកក្រោយ យោធាអាមេរិកនឹងត្រូវចំណាយថវិកា និងកម្លាំងជាច្រើន"។ លោកបន្ថែមទៀតថា សហរដ្ឋអាមេរិក របបដឹកនាំរបស់រដ្ឋាភិបាល ស៊ីរី នឹងធ្វើឲ្យមានចំនួនជនស៊ីវិលស្លាប់កាន់តែច្រើន ជាពិសេសគឺក្មេងៗ។
អគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិ (UN) លោកស្រី Nikki Haley បានព្រមាននៅលើប្រព័ន្ធ Twitter ថា "ការវាយប្រហារណាមួយ ដែលធ្វើឲ្យប៉ះពាល់ដល់ជនស៊ីវិលនៅក្នុងប្រទេស ស៊ីរី នឹងត្រូវស្ដីបន្ទោសលើលោក បាសា អាល់អាសាដ បូករួមទាំងរុស្ស៊ី និង អុីរ៉ង់ ដែលបានគាំទ្ររូបលោកសម្លាប់ប្រជាជនខ្លួនឯង" ។
គួររម្លឹកផងដែរថា ការវាយប្រហារដោយអាវុធគីមីនៅស៊ីរីកាលពីថ្ងៃទី០៤ ខែមេសាកន្លងទៅនៅក្នុងខេត្ត Idlib បណ្ដាលឲ្យប៉ះពាល់ដល់ជីវិតមនុស្សយ៉ាងហោចណាស់ ៨៧នាក់ រួមទាំងក្មេងៗ ៣០នាក់ ហើយត្រូវបាន UN ថ្កោលទោសយ៉ាងខ្លាំងទៅលើរដ្ឋាភិបាលស៊ីរី និងថែមទាំងមានការចូលរួមពីយោធាអាមេរិក ក្នុងការបាញ់មីស៊ីលប្រឆាំងនឹងសកម្មភាពគ្រោះថ្នាក់នេះទៀតផង៕
ប្រភព៖ Express
