មនុស្សរាប់ម៉ឺននាក់ដែលកំពុងចូលរួមព្រឹត្តិការណ៍ប្រគំតន្ត្រីខ្នាតធំមួយឈ្មោះ Rock Am Ring នៅភាគខាងលិចប្រទេសអាល្លឺម៉ង់ ត្រូវបានជម្លៀសចេញជាបន្ទាន់ ចំណែកឯកម្មវិធីត្រូវផ្អាកជាបណ្តោះសិន បន្ទាប់ពីប៉ូលិសបានប្រកាសឲ្យដឹងថា នឹងមានការគំរាមកំហែងដោយភេរវកម្ម។ នេះបើតាមការចេញផ្សាយដោយសារព័ត៌មាន Independent នៅព្រឹកថ្ងៃសៅរ៍ ទី០៣ ខែមិថុនា ឆ្នាំ២០១៧។
មនុស្សប្រមាណជា ៩ម៉ឺននាក់ ដែលចូលរួមគាំទ្រ និងទស្សនាការប្រគំតន្ត្រីខ្នាតធំប្រចាំឆ្នាំមួយ ដែលមានរយៈពេលបីថ្ងៃ ឈ្មោះថា Rock Am Ring ត្រូវបានគេជម្លៀសចេញជាបន្ទាន់ ខណៈដែលប៉ូលិសទីក្រុង Koblenz ប្រកាសថា ព្រឹត្តិការណ៍នេះនឹងមានការវាយប្រហារភេរវកម្មកើតឡើង ក្រោមគម្រោងរបស់ក្រុមសកម្មប្រយុទ្ធ។
គួរបញ្ជាក់ផងដែរថា បន្ទាប់ពីមានការវាយប្រហារជាច្រើនដងក្នុងឆ្នាំ ២០១៦កន្លងទៅ អាល្លឺម៉ង់មានការប្រុងប្រយ័ត្នយ៉ាងខ្លាំង ដោយបានដាក់កម្លាំងស៊ើបអង្កេត និងការពារគ្រប់ទីកន្លែង៕
