ក្នុងរយៈពេល ១៧ឆ្នាំមកនេះ ទីក្រុងម៉ូស្គូបានបង្ហើបឲ្យដឹងនាពេលថ្មីៗនេះថា រុស្ស៊ីវបានលក់ នាវាចម្បាំងប្រមាណ ៥០គ្រឿង ដែលមានចំនួនទឹកប្រាក់សរុប ២៤ពាន់លានដុល្លារអាមេរិក។ នេះបើយោងតាមទីភ្នាក់ងារនាំចេញនាំចូលផលិតផលពាក់ព័ន្ធនឹងវិស័យការពារជាតិ។
ប្រធានគ្រប់គ្រងទូទៅរបស់ក្រុមហ៊ុន Rosoboronexport លោក Alexander Mikheyev បានបញ្ជាក់ថា អត្រានៃការលក់នាវាចម្បាំងទៅក្រៅប្រទេសគឺស្មើនឹង ១២ភាគរយនៃការនាំចេញអាវុធសរុប។ លើសពីនេះក្រុមហ៊ុនខាងលើនឹងធ្វើការចុះហត្ថលេខាលើកិច្ចព្រមព្រៀងថ្មីៗជាច្រើនទៀតនៅក្នុងពិធីតាំងពិព័រណ៍ផលិតផលដ៏ធំមួយនៅទីក្រុង St. Petersburg នាពេលខាងមុខដែលមានឈ្មោះថា 8th International Maritime Defense Show ឬ IMDS-2017។
ជាមួយគ្នានេះដែរ វិទ្យាស្ថានស្រាវជ្រាវសន្តិភាពអន្តរជាតិ (SIPRI) ក៏បានលើកឡើងផងដែរថា ក្នុងអំឡុងឆ្នាំ២០១២ ដល់ឆ្នាំ២០១៦ រុស្ស៊ីជាប្រទេសមួយក្នុងចំណោម ០៥ប្រទេសធំៗ ដែលនាំចេញអាវុធច្រើនជាងគេ ហើយមកទល់ពេលនេះអតិថិជនរបស់ប្រទេសមហាអំណាចមួយនេះកើនឡើងរហូតដល់ ៥០ប្រទេស ខណៈទទួលបានប្រាក់ពីការលក់អាវុធទូទៅចំនួន ៣០.១ពាន់លានដុល្លារអាមេរិកស្មើនឹង៨.១ភាគរយក្នុងឆ្នាំ២០១៥៕
