ខេត្តព្រះសីហនុ៖ ប្រជានេសាទ២នាក់ ត្រូវបានគេជួយសង្គ្រោះរួចជីវិត ក្រោយពីទូកនេសាទ ប្រភេទអួនអូសបង្គា១គ្រឿងរបស់ពួកគេ បានលិចនៅលំហសមុទ្រ ចម្ងាយប្រហែល ៧ គីឡូម៉ែត្រ ខាងត្បូងកោះពស់ នៅថ្ងៃទី២៣ ខែមិថុនា ឆ្នាំ២០១៧នេះ ម៉ោងប្រហែល ២ភ្លឺ។
ការជួយសង្គ្រោះ គឺនៅ៥ម៉ោងក្រោយ ដោយទូកយន្តប្រភេទធំដឹកភ្ញៀវទេសចរណ៍ របស់ក្រុមហ៊ុន GTVC ខណៈជនរងគ្រោះទាំង២នាក់ខាងលើកំពុងហែលទឹកតោងប៊ីដុងជរ័ នៅខាងត្បូងកោះឫស្សី (រសាត់តាមទឹកលលក ចម្ងាយប្រហែលជាង១០គីឡូម៉ែត្រពីកន្លែងលិច) រួចក៏បាននាំមកប្រគល់ជូនកម្លាំងជំនាញប្រចាំការគោលដៅផែទេសចរណ៍ ដើម្បីសាកសួរព័ត៌មាន។
បើតាមសមត្ថកិច្ចបានឲ្យដឹងថា ជនរងគ្រោះទាំង២នាក់មានឈ្មោះ សូន វណ្ណី ភេទប្រុស អាយុ២៧ឆ្នាំ មុខរបរនេសាទ (ត្រូវជា ម្ចាស់ទូក)និងម្នាក់ទៀត២.ឈ្មោះ សុន សុធី ភេទប្រុស អាយុ ៣៥ ឆ្នាំ ជាកម្មករនេសាទ។ ទូកនេសាទរបស់ពួកគេលិច ដោយសារការអូសមងទាក់ជាមួយថ្ម និងគាប់ជួនអាកាសធាតុមានភ្លៀងខ្យល់ខ្លាំង ទឹករលកខ្ពស់ វាយគ្រប បណ្តាលឲ្យលិច។
ប្រភពដដែលបន្តថា សម្ភារៈខូចខាតរួមមាន ទូកឈើពណ៍ខៀវ ម៉ាស៊ីនគោយន្តកម្លាំង៤២សេះ១គ្រឿង លិចបាត់ទាំងស្រុង អួនអូសបង្គាចំនួន៣ កំផ្លេ វិទ្យុទាក់ទង១គ្រឿង ឧបករណ៍មើលផ្លូវ មើលបាតសមុទ្រ ហៅថាដាវ១គ្រឿង និងទូរស័ព្ទ១គ្រឿង។
