មនុស្សចំនួន ១២នាក់ស្លាប់ និង ៦៥នាក់ផ្សេងទៀតត្រូវបានរំដោះចេញពីអណ្ដាតដ៏សន្ធោសន្ធៅខណៈអគ្គីភ័យបានឆាបឆេះអាគារ Grenfell Tower របស់អង់គ្លេស នៅជាប់ផ្លូវ Latimer Road ភាគខាងជើងសង្កាត់ Kensington ទីក្រុងឡុងដ៍ កាលពីម្សិលមិញ។
មេនគរបាលលោក Stuart Cundy បានបញ្ជាក់ថា ឧបទ្ទវហេតុគ្រោះអគ្គីភ័យ នៅអាគារកម្ពស់ ២៤ជាន់ Grenfell Tower របស់អង់គ្លេសកាលពីម្សិលមិញ មកដល់ថ្ងៃនេះមានមនុស្ស ១២នាក់បានស្លាប់ និង ៦៨នាក់រងរបួស ខណៈដែល ៦៥នាក់ផ្សេងទៀតត្រូវបានរំដោះចេញពីអាគារ ចំពេលភ្លើងកំពុងឆេះ។
គួរបញ្ជាក់ផងដែរថា នៅវេលាម៉ោង ៤ទៀបភ្លឺថ្ងៃពុធ (ម៉ោងនៅនៅក្នុងស្រុក) កងកម្លាំង និងរថយន្តពន្លត់អគ្គីភ័យចំនួន ២៤០នាក់ បានធ្វើប្រតិបត្តិការសង្គ្រោះ និងជម្លៀសមនុស្សជាច្រើនរយនាក់ចេញពីអគារកម្ពស់ ២៤ជាន់ ដែលកំពុងឆាបឆេះដ៏សន្ធោសន្ធៅ។ យ៉ាងណាមិញចំពោះមូលហេតុនៃការឆេះ គឺត្រូវបានសន្និដ្ឋានថា បណ្ដាលមកពីកំហុសអគ្គិសនីក្នុងទូទឹកកក៕
