Rolls-Royce ដែលជាក្រុមហ៊ុនផលិតរថយន្តល្បីល្បាញបំផុតរបស់ ចក្រភពអង់គ្លេស បានតាំងបង្ហាញរថយន្ត Rolls-Royce ឆ្នាំ ២០១៧ ក្នុងរមណីយដ្ឋានបឹង កូម៉ូ ក្បែរជើងភ្នំ អាល់ របស់ប្រទេស អ៊ីតាលី ។ ទោះជាក្រុមហ៊ុនមិនបានប្រកាសតម្លៃរបស់ Rolls-Royce ជំនាន់ឆ្នាំ ២០១៧ ប៉ុន្តែព័ត៌មានជាក់លាក់ពីអតិថិជនបញ្ជាក់ថា Rolls-Royce ២០១៧ មានតម្លៃចន្លោះ ១២ លាន ៨ សែនដុល្លារ ដល់ ១៣ លានដុល្លារ អាមេរិក ។
ក្រុមហ៊ុនផលិតរថយន្តដូច្នេះសម្រាប់តម្រូវការអតិថិជនពិសេសមានចំនួនតិចតួចប៉ុណ្ណោះ ដោយសារតែតម្លៃថ្លៃ ប៉ុន្តែអ្នកចូលចិត្ត Rolls-Royce ច្រើននាក់បានចូលរួមក្នុងពិធីតាំងបង្ហាញក្នុងឆ្នាំនេះ ទោះជាពួកគេមិនអាចទិញក៏ដោយ ។ អ្វីដែលប្លែកសម្រាប់ Rolls-Royce ឆ្នាំ ២០១៧ គឺក្រុមឌីហ្សាញបានរចនារថយន្តទំនើបបំផុតនេះដូចទៅនឹងរថយន្តដំបូងដែលផលិតក្នុងទសវត្សឆ្នាំ ១៩២០ និងទសវត្សឆ្នាំ ១៩៣០ ដោយមានកន្លែងរក្សាទុកឥវ៉ាន់របស់ម្ចាស់រថយន្ត ហើយវាមានកៅអីតែពីរប៉ុណ្ណោះ ។
តួរបស់រថយន្តគ្មានតំណឡើយ ដោយផ្នែកបាទខាងក្រោមរថយន្តភ្ជាប់រហូតដល់ទៅផ្នែកខាងក្រោយដែលមានរៀងមូលស្ដួច ប៉ុន្តែផ្នែកខាងមុខធំ ហើយដំបូលទូលាយ កញ្ចក់ខាងលើ និងកញ្ចក់ចំហៀងធំ ធ្វើឲ្យអ្នកអង្គុយក្នុងរថយន្តអាចមើលឃើញទេសភាពបានងាយស្រួល ។ដោយសារវាមានកៅអីតែពីរ ធ្វើឲ្យផ្នែកខាងក្នុងរថយន្តទូលាយ សម្រាប់រក្សាទុកសម្ភារ និងមានវ៉ាលីបំពាក់នៅក្នុងរថយន្តស្រាប់ ។
នាយកប្រតិបត្តិក្រុមហ៊ុន Rolls-Royce និយាយថា ពិធីជួបជុំឆ្នាំនេះ ធំជាងពេលមុនៗទាំងអស់ ដោយប្រតិបត្តិបញ្ជាក់ថា Rolls-Royce គូថស្ដួច គឺជារថយន្តដែលទាក់ទាញបំផុត តាមការចង់បានរបស់អតិថិជន ។ ក្រុមហ៊ុន Rolls-Royce ត្រូវបានបង្កើតឡើងក្នុងឆ្នាំ ១៩០៦ នៅចក្រភពអង់គ្លេស ហើយល្បីល្បាញដោយសារធ្វើបានតាមតម្រូវការរបស់អតិថិជន និងមានការរចនាបែបទំនើប និងជារថយន្តដែលខ្សែរាជវង្សចក្រភពអង់គ្លេស និងមនុស្សល្បីៗ ចាប់ពីអ្នកជំនាញ ដល់មន្ត្រីជាន់ខ្ពស់និយមប្រើប្រាស់បំផុត ។
ប្រភពៈ dezeen