រាជធានីភ្នំពេញ៖ បុគ្គលិកនៅក្នុងក្រសួងពីរ នឹងមានសំណាងគេ ពីក្របខ័ណ្ឌគោលនយោបាយជាតិគាំពារសង្គម ២០១៦-២០២៥ ដែលទើបសម្ពោធដាក់អោយប្រើប្រាស់ជាផ្លូវការនូវ នៅព្រឹកថ្ងៃទី២៤ ខែកក្កដា ឆ្នាំ២០១៧នេះ ដែលបានធ្វើឡើងនៅវិមានសន្តិភាពរាជធានីភ្នំពេញ។
សម្តេចតេជោ ហ៊ុន សែន បានថ្លែងក្នុងពិធីសម្ពោធកាលព្រឹកមិញនេះថា ក្រសួងសេដ្ឋកិច្ចនិងហិរញ្ញវត្ថុ និងក្រសួងសុខាភិបាលចាប់ផ្តើមអនុវត្តគោលនយោបាយជាតិគាំពារសង្គមនេះមុនគេ ដោយតម្រូវឲ្យមានការគាំពារសុខភាពស្ត្រីមានផ្ទៃពោះ ពីព្រោះពួកគាត់ពិតជាត្រូវការជំនួយជាចាំបាច់ហើយពួកអាចជួបបញ្ហាប្រឈមជាច្រើនអំឡុងពេលពរពោះរហូតដល់សម្រាលកូន។
ដូច្នេះក្រសួងសេដ្ឋកិច្ច និងក្រសួងពាក់ព័ន្ធនានាត្រូវចាប់ផ្តើមធ្វើពីរឿងនេះមុនគេ ថាត្រូវផ្តល់អោយគេមួយខែប៉ុន្មាន? តែទោះជាយ៉ាងណា ការដោះស្រាយបញ្ហានេះ តម្រូវឲ្យមានលក្ខខ័ណ្ឌច្បាស់លាស់មួយចំនួន។ ជាមួយគ្នានោះ បញ្ហាជនពិការ ក៏នឹងត្រូវចាប់ផ្តើមជាបន្តបន្ទាប់ផងដែរ។
សម្តេចតេជោ មានប្រសាសន៍បញ្ជាក់ពីគោលនយោបាយជាតិនេះដែរថា សេចក្តីព្រាងអំពីក្របខ័ណ្ឌគោលនយោបាយជាតិគាំពារសង្គម ២០១៦-២០២៥ គឺជាផែនទីបង្ហាញផ្លូវរយៈកាលវែង ដែលផ្តោតលើសសរស្តម្ភចំនួនពីរគឺ ប្រព័ន្ធជំនួយសង្គម និងប្រព័ន្ធសន្តិសុខសង្គម។
ចក្ខុវិស័យរយៈពេលវែងរបស់រាជរដ្ឋាភិបាលនេះ គឺ សម្រាប់ការអភិវឌ្ឍប្រព័ន្ធគាំពារសង្គម គឺការកសាងប្រព័ន្ធគាំពារសង្គមមួយដែលមានប្រសិទ្ធភាព និងចិរភាពហិរញ្ញវត្ថុ ដើម្បីបម្រើដល់គោលនយោបាយ កាត់បន្ថយនិងទប់ស្កាត់ភាពក្រីក្រ ភាពងាយរងគ្រោះ រួមចំណែកដល់ការអភិវឌ្ឍ និងគាំពារធនធានមនុស្សឲ្យកាន់តែរឹងមាំ និងទូលំទូលាយ ព្រមទាំងជំរុញកំណើនសេដ្ឋកិច្ចជាតិផងដែរ។
សម្តេចបានបន្តថា នេះគឺជាការកំណត់ផែនការយុទ្ធសាស្ត្ររបស់រាជរដ្ឋាភិបាលក្នុងការធានាឲ្យបាននូវសន្តិសុខ ប្រាក់ចំណូល និងកាត់បន្ថយភាពងាយរងគ្រោះផ្នែកសេដ្ឋកិច្ច និងហិរញ្ញវត្ថុរបស់ប្រជាជនសំដៅលើកកម្ពស់សុខុមាលភាព។ គោលដៅ នៃក្របខ័ណ្ឌគោលនយោបាយនេះ គឺធ្វើការបន្ស៊ី ប្រមូលផ្តុំ និងពង្រឹងកម្មវិធីដែលមានស្រាប់ ដើម្បីបង្កើនប្រសិទ្ធភាព តម្លាភាព និងសង្គតិភាពនៃរបប ឬកម្មវិធីទាំងឡាយ ក្នុងប្រព័ន្ធ គាំពារសង្គមទាំងមូល រួមទាំងការពង្រីកវិសាលភាពដែលតូចចង្អៀតនៅឡើយ ដើម្បីឆ្លើយតបនឹងតម្រូវការសេវាថែទាំសុខភាព ព្រមទាំងហានិភ័យផ្សេងៗទៀត។
