ខេត្តបន្ទាយមានជ័យ៖ មន្ត្រីគណៈកម្មការទទួលពលករខ្មែរខុសច្បាប់ បានឲ្យដឹងថា រយៈពេល៥ថ្ងៃ អាជ្ញាធរថៃ បានចាប់បញ្ជូនពលករខ្មែរជិត ៤ ពាន់នាក់ មកកម្ពុជាវិញ។ នេះបើចាប់ពីថ្ងៃទី១ -៥ កក្កដា ឆ្នាំ២០១៧នេះម្សិលមិញ។
លោកស្រី ស៊ីន ណាំយ៉ុង មន្ត្រីគណៈកម្មការទទួលពលករខ្មែរខុសច្បាប់ បានឲ្យដឹងថា នៅអំឡុងពេលដែលអាជ្ញាធរថៃអនុវត្តច្បាប់ការងារថ្មីរបស់ខ្លួននោះ រយៈពេល៥ថ្ងៃដើមខែកក្កដានេះ មានពលករខ្មែរខុសច្បាប់ចំនួនសរុប ៣,៦៨៤នាក់ មានស្រី១,១៦០នាក់ និងកុមារ ២៨៦នាក់ ត្រូវបានភាគីចាប់បញ្ជូនតាមច្រកទ្វារអន្តរជាតិប៉ោយប៉ែត។
ជុំវិញការចាប់បញ្ជូនដូចទឹកបាក់ទំនប់នេះពលករខ្មែរប្រុសស្រីដែលត្រូវបង្ខំឲ្យមកកម្ពុជាវិញបានឲ្យដឹងថា នៅពេលអាជ្ញាធរថៃ បានចាប់រឹតបន្តឹងលើការអនុវត្តច្បាប់ថ្មីនោះ ថៅកែថៃបានបញ្ឈប់ការងាររបស់ពួកគេ ដោយតម្រូវឲ្យទៅធ្វើសំណុំឯកសារច្បាប់ត្រឹមត្រូវ ទើបហ៊ានទទួលធ្វើការងារមកវិញ។
ការទាមទារឯកសារស្របច្បាប់នេះ ពួកគេខ្លះត្រូវបង្ខំចិត្តខ្ចីលុយថៅកែថៃទៅធ្វើច្បាប់ការងារនៅប្រទេសថៃ ដោយក្នុងម្នាក់ៗធ្វើលិខិតឆ្លងដែនអស់ ២១៥ដុល្លារ និងថ្លៃក្រុមហ៊ុនច្បាប់ការងារតម្លៃ ១២៥ដុល្លារ និងត្រូវចំណាយច្បាប់ការងារប្រទេសថៃមានបង់ពន្ធ និងបង់សេវាសុខភាពប្រមាណ ១៨,០០០បាតបន្ថែមទៀត។ នេះបើតាមចុះផ្សាយរបស់គេហទំព័រអគ្គស្នងការនគរបាលជាតិ។
ពួកគេបានបន្ថែមថា បន្ទាប់ពីអនុញ្ញាតឲ្យធ្វើច្បាប់ការងារហើយ ពួកគេត្រូវបង់ប្រាក់ជាង៣ម៉ឺនបាតទៀតក្នុងម្នាក់ ទើបអាចធ្វើការងារបាននៅទីនោះ ប៉ុន្តែដោយសារត្រូវដោះបំណុលថៅកែរួមទាំងត្រូវច្រើនបែបនេះ ពួកគេគ្មានលទ្ធភាពទេ ទើបសម្រេចចិត្តដើរចេញពីកន្លែងធ្វើការងារឲ្យតម្រួតថៃចាប់បញ្ជូនមកកម្ពុជាវិញ។ ជាមួយគ្នាដែរ ពួកគេក៏បានសំណូមពរដល់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា មានជួយអន្តរាគមន៍និងសម្រួលដល់ពួកគេផងដែរ៕
