រាជធានីភ្នំពេញ៖ ក្រុមមុខសញ្ញាចោរប្លន់សម្លាប់យកឡានហាយឡែនឌ័រមួយគ្រឿង នៅក្នុងស្រុករលាប្អៀរ ខេត្តកំពង់ឆ្នាំង កាលពីថ្ងៃទី១៦ ខែកក្កដា កន្លងទៅនោះ ត្រូវបានសមត្ថកិច្ចចម្រុះមកពីអគ្គស្នងការនគរបាលជាតិ ស្នងការរាជធានីភ្នំពេញ ខេត្តកំពង់ឆ្នាំងនិងខេត្តពោធិ៍សាត់ តាមប្រមាញ់ចាប់បានហើយ នៅក្នុងខណ្ឌឫស្សីកែវ រាជធានីភ្នំពេញ កាលពីថ្ងៃព្រហស្បតិ៍ម្សិលមិញ។
បើតាមសមត្ថកិច្ចបានឲ្យដឹងថា ជនសង្ស័យប្លន់បាញ់សម្លាប់ម្ចាស់ឡានហាយឡែនឌ័រនោះ សមត្ថកិច្ចឃាត់ខ្លួនបានចំនួន៣នាក់ ដោយទី១ ឈ្មោះ ប៉ែន សុខន ភេទប្រុស អាយុ ៣៥ឆ្នាំ ជនជាតិខ្មែរ រស់នៅផ្ទះជួល សង្កាត់ទួលសង្កែ ខណ្ឌឫស្សីកែវ (ជាជនដៃដល់បាញ់សម្លាប់) ទី២ ឈ្មោះ សុវណ្ណ ឧត្តម ហៅ អាដំ ភេទ ប្រុស អាយុ ២៧ឆ្នាំ ជនជាតិខ្មែរស្នាក់នៅភូមិព្រៃខ្មែរ ឃុំរលាប្អៀរ ស្រុករលាប្អៀរខេត្តកំពង់ឆ្នាំ និងទី៣ ឈ្មោះ រ៉ា ឌីម៉ា ហៅ ម៉ា (ជាអ្នកជួលរថយន្តជនរងគ្រោះ) ភេទ ប្រុស អាយុ១៩ ឆ្នាំ ជនជាតិខ្មែរ ស្នាក់នៅភូមិប៉ែន ឃុំលាច ស្រុកភ្នំក្រវ៉ាញ ខេត្តពោធិ៍សាត់។
សមត្ថកិច្ចបានបន្ថែមថា ប្រតិបត្តិការបង្ក្រាបនេះ សមត្ថកិច្ចបានដកហូតវត្ថុតាង អាវុធខ្លី ម៉ាក រ៉ូឡូ មួយដើម និងរថយន្តហាយឡែនឌ័ររបស់ជនរងគ្រោះឈ្មោះ អៀង សុចិត្រា ភេទប្រុស អាយុ៤៣ឆ្នាំ មានទីលំនៅភូមិចំការចេក សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ មានមុខរបរជាអ្នករត់តាក់ស៊ី។
គួររម្លឹកផងដែរថា កាលពីថ្ងៃទី១៦ ខែកក្កដា ឆ្នាំ២០១៧ វេលាម៉ោងប្រមាណជា៧យប់ មានសាកសពបុរសមិនស្គាល់អត្តសញ្ញាណម្នាក់ ត្រូវបានអ្នកដំណើរប្រទះ ក្រុមឃាតកចាញ់សម្លាប់ ហើយសែងចេញពីរថយន្តទម្លាប់ចោលនៅក្បែរផ្លូវជាតិលេខ ៥ ក្នុងចន្លោះបង្គោលគីឡូម៉ែត្រលេខ ៧០ និង៧១ ដែលស្ថិតក្នុងភូមិស្ពៅ ឃុំទឹកហូត ស្រុករលាប្អៀរ៕
