ខេត្តព្រះសីហនុ៖ យុវជនម្នាក់ដែលត្រូវបាន កម្លាំងសមត្ថកិច្ចខេត្តព្រះសីហនុ ចាប់ឃាត់ខ្លួន ពាក់នឹង ការបង្ហោះសារតាម Facebook គំរាមសម្លាប់សម្ដេចនាយករដ្ឋមន្ត្រីនេះ បានបដិសេធន៍ថា ខ្លួនមិនបានបញ្ចេញសារប្រមាទ សម្ដេចតេជោនោះទេ។
នេះបើតាមលោកវរសេនីយ៍ឯក អ៊ឹម វល្ល័ក្ខណ៍ ស្នងការរងខេត្តព្រះសីហនុ ដែលជាអ្នកដឹកនាំ កម្លាំងនគរបាលសន្តិសុខផ្ទៃក្នុង និងប្រឆាំងភេរវកម្មខេត្តព្រះសីហនុ ឃាត់ខ្លួនយុវជនខាងលើ បានឲ្យដឹងនៅព្រឹកថ្ងៃទី១៣ ខែកក្កដានេះ មុននឹងបញ្ជូនទៅកាន់អគ្គស្នងការដ្ឋាននគរបាលជាតិ។
លោកវរសេនីយ៍ឯក អ៊ឹម វល្ល័ក្ខណ៍ បានបញ្ជាក់ថា៖ កាលពីព្រឹកមិញយុវជនខាងលើបានចូលខ្លួនមកសារភាពស្នងការខេត្តថា រូបគេមិនបានសរសេរសារ គំរាមប្រមាទសម្លាប់សម្ដេចនាយករដ្ឋមន្ត្រីទេ គឺ គណនីហ្វេសប៊ុករបស់ខ្លួនមានគេលួចហែកប្រើ។
លោកបានបន្តថា យុវជនរូបនេះមានឈ្មោះ ពេជ្រ រដ្ឋា អាយុ ២៤ឆ្នាំ រស់នៅភូមិអុង ឃុំរាម ស្រុកព្រៃនប់ ខេត្តព្រះសីហនុ មុខរបរជាអ្នកបើកបររថយន្តដឹកបុគ្គលិកក្រុមហ៊ុន កាស៊ីណូSV នៅជិតធនាគារជាតិ ក្នុងសង្កាត់លេខ៣ ក្រុងព្រះសីហនុ៕ អត្ថបទ៖ ប៊ី សារី
