មកដល់ពេលនេះដ្បិតតែភាពយន្តរឿង "ហ្លួងព្រះស្ដេចកន" មិនទាន់ដល់ ថ្ងៃចាក់បញ្ចាំងក្ដី ប៉ុន្តែរឿងប្រវត្តិសាស្ត្រមួយនេះ ល្បីកក្រើកខណៈដែលផលិតករ អ្នកសិល្បៈ និងអ្នកបានទស្សនាឈុតខ្លីៗមួយចំនួនតែងអួតតៗគ្នាថា ជាភាពយន្តហូលីវូដខ្មែរ ដំបូងបង្អស់។
យ៉ាងណាមិញ សូម្បីតែតារាសម្ដែងជើងចាស់អ្នកស្រី ឌី សាវ៉េត បានស្នើដល់ក្រសួង និងស្ថាប័នពាក់ព័ន្ធការងារសិល្បៈថា គួរធ្វើមេដាយ ដាំពេជ្រ មួយជូនឯកឧត្ដម ម៉ៅ អាយុទ្ធ ជាការលើកទឹកចិត្តគាត់ ដែលបានខំប្រឹងទាំងកម្លាំងកាយចិត្ត ពេលវេលា សឹងតែ២៤ម៉ោង ដឹកនាំផលិតរឿងនេះឡើង ទាំងលោកមានវ័យជរា អាយុជិត៨០ឆ្នាំទៅហើយ។
ការលើកឡើងរបស់អ្នកស្រី ឌី សាវ៉េត ដ្បិតតែមិនទាន់មានការឆ្លើយតបពីតំណាងស្ថាប័ន ឬក្រសួងពាក់ព័ន្ធក្ដី ប៉ុន្តែសម្ដីរបស់អ្នកស្រី ត្រូវបានបណ្ដាអ្នកសារព័ត៌មានកត់ចំណាំថា មិនយូរទេ អាចនឹងមានការឆ្លើយតប ព្រោះស្នាដៃផលិតរឿងប្រវត្តិសាស្ត្រមួយនេះមិនត្រឹមតែមានការចាប់អារម្មណ៍ពីអ្នកសិល្បៈ និងទស្សនិកជនប៉ុណ្ណោះទេ សូម្បីមន្ត្រីរាជការថ្នាក់ខ្ពស់ជាច្រើន ក៏យកចិត្តទុកដាក់ផងដែរ៕
