ខេត្តកោះកុង៖ នៅថ្ងៃទី ០៣ ខែសីហា ឆ្នាំ ២០១៧នេះ រដ្ឋបាលខេត្តកោះកុង បានរៀបចំពិធីបញ្ចុះបឋមសិក្សាសាងសង់រូបសំណាក លោកព្រឹទ្ធាចារ្យ សាយ ភូថង នៅរង្វង់មូល និង ស្លាកសម្គាល់ “វិថីសាយភូថង” ក្នុងភូមិសាស្ត្រឃុំអណ្ដូង ស្រុកបុទុមសាគរ ក្រោយអធិបតីភាព រដ្ឋមន្ត្រីក្រសួងបរិស្ថាន សាយ សំអាល់។
រូបសំណាក លោក សាយ ភូថង នេះគ្រោងសាងសង់ឡើងក្នុង កម្ពស់ ១,២ម៉ែត្រ ដោយប្រើប្រាស់រយៈពេល ៥ ខែ និងចំណាយថវិកាប្រមាណ ៨ ម៉ឺនដុល្លារ ដែលជាការឧបត្ថម្ភ របស់រដ្ឋមន្ត្រីក្រសួងបរិស្ថាន និងសប្បុរសជន។
ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានមានប្រសាសន៍ថា ការសាងសង់រង្វង់មូល និងស្លាកសម្គាល់នេះ គឺដើម្បីដឹងគុណលោកព្រឹទ្ធាចារ្យ សាយ ភូថង ដែលបានចូលរួមជ្រោង ទង់តស៊ូរំដោះប្រជាជនចេញពី របបអាណានិគមនិយមបារាំង, របបលន់ នល់ និងរបបប្រល័យពូជសាសន៍ ប៉ុល ពត ហើយនឹងបានចូលរួមជ្រោងទង់ បង្រួបបង្រួម និងផ្សះផ្សាជាតិ។
គួររម្លឹកផងដែរថា លោក សាយ ភូថង គឺជាជីតារបស់លោកជំទាវ មិថុនា ភូថង អភិបាលខេត្តកោះកុង និងជាអតីត សមាជិកគណៈអចិន្ត្រៃយ៍គណបក្សប្រជាជនកម្ពុជា ជាអនុប្រធានក្រុមប្រឹក្សារដ្ឋ (អនុប្រធានរដ្ឋ) សមាជិកសភាខេត្តកណ្ដាល និងចុងក្រោយ ជា ឧត្តមទីប្រឹក្សាព្រះមហាក្សត្រ ហើយបានទទួលមរណភាពនៅថ្ងៃទី១៣ ខែមិថុនា នេះ ដោយរោគាពាធក្នុងអាយុ៩៦ឆ្នាំនៅទីក្រុងបាងកក ប្រទេសថៃ៕ រូបភាព៖ ក្រសួងបរិស្ថាន
