រាជធានីភ្នំពេញ៖ ឯកឧត្តមរដ្ឋមន្ត្រី ស៊ុន ចាន់ថុល បានឲ្យដឹងថា រាជរដ្ឋាភិបាលកម្ពុជាបានគ្រោងនឹងចំណាយថវិកាជាង ៦០លាន ដុល្លារអាមេរិក ក្នុងការពង្រីកផ្លូវជាតិលេខ ២ ឡើងវិញ ដើម្បីធ្វើឲ្យប្រព័ន្ធចរាចរណ៍កាន់តែធំទូលាយជាងមុន ពោលគឺពង្រីកទៅដល់១៣ម៉ែត្រនិងមានចរាចរណ៍ផ្លូវបួនគន្លង។
ការលើកឡើងរបស់ឯកឧត្ដម ស៊ុន ចាន់ថុល រដ្ឋមន្រ្ដីក្រសួងសាធារណការ បែបនេះ បានធ្វើឡើងក្នុងឱកាស ចុះត្រួតពិនិត្យការដ្ឋានជួសជុល និងសាងសង់ផ្លូវជាតិលេខ២ កាលពីថ្ងៃ១ ដើមខែសីហាឆ្នាំ២០១៧នេះ។
ឯកឧត្តមទេសរដ្ឋមន្ត្រីបានបន្ថែមថា ថវិកាសម្រាប់គម្រោងជួសជុលផ្លូវនេះ ជា កម្ចីឥណទានពី រដ្ឋាភិបាលនៃសាធារណរដ្ឋកូរ៉េ ប្រមាណ ៥៦លានដុល្លារ និងថវិកាបដិភាគរបស់រាជរដ្ឋាភិបាល កម្ពុជាប្រមាណ ៨,៥លានដុល្លារ ដើម្បីពង្រីកផ្លូវជាតិលេខ២ គិតចាប់ពីរង្វង់មូលក្រុង តាខ្មៅដល់ខេត្តតាកែវ ដែលមានប្រវែងជាង ១០០គីឡូម៉ែត្រ។ គម្រោងនេះគ្រោងនឹងបើកការដ្ឋាននៅអំឡុង ឆ្នាំ២០១៨ខាងមុខ។
