ប្រទេសឥណ្ឌា កំពុងបញ្ជាទិញយន្តហោះចម្បាំងម៉ាក Dassault Rafale ជំនាន់ទី ៤ ចំនួន ៣៦គ្រឿង បន្ថែមទៀតសម្រាប់បង្កើនសមត្ថភាពកងទ័ពអាកាសរបស់ខ្លួន។ នេះបើយោងតាមគេហទំព័រសារព័ត៌មាន sputnik បានចុះផ្សាយនាព្រឹកថ្ងៃព្រហស្បតិ៍ ទី៣១ ខែសីហា ឆ្នាំ២០១៧។
បន្ទាប់ពីមានការចរចាអស់រយៈពេល ៤ឆ្នាំមក ក្រុមហ៊ុនផលិតយន្តហោះ Dassault Aviation របស់ប្រទេសបារាំង បានចុះហត្ថលេខាលើកិច្ចព្រមព្រៀងមួយ ដែលមានតម្លៃ ៩លានដុល្លារ ជាមួយរដ្ឋាភិបាលឥណ្ឌា កាលពីខែកញ្ញា ឆ្នាំមុន ហើយត្រូវបានគេរំពឹងថា នឹងរួចរាល់ជាស្ថាពរនៅខែវិច្ឆិកាឆ្នាំ២០១៩។
យោងតាមកាសែត Times of India បានឲ្យដឹងថា មូលដ្ឋានកងទ័ពអាកាសឥណ្ឌា IAF បានធ្វើបទបង្ហាញមួយចំនួន ស្ដីពីតម្រូវការប្រតិបត្តិការសម្រាប់យន្តហោះចម្បាំងពហុម៉ាស៊ីន ចំនួន ៣គ្រឿង ដែលមានប្រសិទ្ធភាពខ្ពស់ជាងយន្តហោះប្រយុទ្ធជំនាន់ទី ៥ Sukhoi /HAL ដែលជាគម្រោងអភិវឌ្ឍន៍រួមគ្នាជាមួយរុស្ស៊ី ត្រូវបានជាប់គាំង។
គួរបញ្ជាក់ផងដែរថា ដើម្បីរក្សាបូរណភាពទឹកដីរវាងទីក្រុងប៉េកាំង និងប្រទេសឥណ្ឌា មេបញ្ជាការកងទ័ពអាកាសឥណ្ឌា លោក Arup Raha បានអះអាងថា យើងត្រូវការយន្តហោះចម្បាំងធុនមធ្យម ចំនួន ២០០ ទៅ២៥០គ្រឿង និងអាកាសយានិក ចំនួន ៣៣នាក់ ក្នុងកម្រិតប្រតិបត្តិការខុសៗគ្នា នៅឆ្នាំ ២០២៧ ចំនួននេះត្រូវបានគេរំពឹងថា នឹងអាចមានការកើនឡើងដល់ ៤២នាក់៕
