ក្រសួងការបរទេសអាមេរិក បានបញ្ជាឲ្យហាមឃាត់ការធ្វើដំណើរទៅកាន់ប្រទេសកូរ៉េខាងជើង សម្រាប់អ្នកកាន់លិខិតឆ្លងដែនអាមេរិក។ នេះបើយោងតាមសារព័ត៌មាន រុស្ស៊ី (RT) បានចុះផ្សាយនាយប់ថ្ងៃពុធ ទី០២ ខែកក្កដា ឆ្នាំ២០១៧។
ក្រសួងការបរទេសអាមេរិកបានធ្វើការកំណត់ជាផ្លូវការថា ថ្ងៃទី០១ ខែកញ្ញា ឆ្នាំ២០១៧ គឺជាពេលដែលបម្រាមហាមឃាត់ពលរដ្ឋរបស់ខ្លួន មិនឲ្យធ្វើដំណើរទៅកាន់ប្រទេសកូរ៉េខាងជើង តទៅទៀត។ ក្រោមបម្រាមហាមឃាត់នេះ រាល់លិខិតឆ្លងដែនសហរដ្ឋអាមេរិកទាំងអស់ នឹងត្រូវអស់សុពលភាពចាប់ពីដើមខែក្រោយតទៅ សម្រាប់ការធ្វើដំណើរឆ្លងកាត់កូរ៉េខាងជើង នោះឡើយ លុះត្រាតែត្រូវផ្តល់សុពលភាពឡើងវិញជាពិសេស សម្រាប់ការធ្វើដំណើរបែបនេះ។
ជុំវិញសេចក្ដីហាមឃាត់នេះ ក៏មានការលើកលែងផងដែរ សម្រាប់ការធ្វើដំណើរមនុស្សធម៌ និងសម្រាប់អ្នកកាសែតនៅក្នុងករណីមួយចំនួន។ បម្រាមនេះត្រូវគេរំពឹងថា នឹងមានសុពលភាពរយៈពេលមួយឆ្នាំ លុះត្រាតែវានឹងត្រូវលុបចោលវិញមុនកាលកំណត់ ដោយរដ្ឋលេខាធិការអាមេរិកលោក Rex Tillerson។
គួររម្លឹកផងដែរថា បម្រាមធ្វើដំណើរនេះ ត្រូវបានប្រកាសជាលើកដំបូងកាលពីខែកក្កដាកន្លងទៅ ខណៈភាពតានតឹងរវាងអាមេរិក និងកូរ៉េខាងជើង មានការកើនឡើងយ៉ាងខ្លាំងក្នុងប៉ុន្មានខែចុងក្រោយនេះ និងមរណភាពនៃនិស្សិតអាមេរិកលោក Otto Warmbier ដោយមានបញ្ហារបួសសរសៃប្រសាទធ្ងន់ធ្ងរ បន្ទាប់ពីត្រូវបានអាជ្ញាធរទីក្រុងព្យុងយ៉ាងឃុំខ្លួន អស់រយៈពេលប្រហែល ១៨ខែ អំឡុងពេលធ្វើដំណើរកម្សាន្តនៅប្រទេសកូរ៉េខាងជើង៕
