លោកប្រធានាធិបតីអាមេរិក ដូណាល់ ត្រាំ បានបញ្ជាក់ជាយូរមកហើយថា លោកនឹងជួបប្រជុំផ្ទាល់មុខជាមួយមេដឹកនាំកូរ៉េខាងជើងលោក គីម ជុងអ៊ុន ខណៈពេលដែលមានភាពតានតឹងរវាងប្រទេសទាំងពីរកំពុងតែកើនឡើង។ នេះបើយោងតាមគេហទំព័រសារព័ត៌មាន CNN បានចុះផ្សាយនាយប់ថ្ងៃពុធ ទី០២ ខែកក្កដា ឆ្នាំ២០១៧។
លោក ត្រាំ បានប្រាប់សារព័ត៌មាន Bloomberg ក្នុងបទសម្ភាសន៍មួយ កាលពីខែឧសភាថា មិនមានប្រធានាធិបតីសហរដ្ឋអាមេរិក មកអង្គុយជាមួយមេដឹកនាំកូរ៉េខាងជើង ខណៈដែលកំពុងមានភាពតានតឹងរវាងគ្នានោះទេ។ លោកបានបន្តទៀតថា រូបខ្ញុំសុខចិត្តជួបជាមួយលោក គីម "ស្ថិតក្នុងស្ថានភាពត្រឹមត្រូវ" ដើម្បីបំបាត់ភាពតានតឹងជុំវិញកម្មវិធីនុយក្លេអ៊ែរកូរ៉េខាងជើង និងដំណោះស្រាយការទូតរវាងប្រទេសទាំងពីរផងដែរ។
ជាច្រើនខែនៃភាពតានតឹង និងការបង្ហាញសាច់ដុំយោធារបស់ទីក្រុងព្យុងយ៉ាង បានចាប់ផ្ដើមសាកល្បងមីស៊ីលឆ្លងទ្វីប ជាលើកទីពីរ នៅក្នុងខែកក្កដានេះ បានបង្ហាញថា កម្មវិធីមីស៊ីលរបស់ខ្លួន អាចមានភាពជឿនលឿនច្រើនជាងពីមុន ទោះបីជាមានការដាក់ទណ្ឌកម្មជាច្រើនឆ្នាំដោយសហគមន៍អន្តរជាតិក៏ដោយ។
គួរបញ្ជាក់ផងដែរថា សេតវិមាន បានប្រាប់អ្នកកាសែតឲ្យដឹងថា សហរដ្ឋអាមេរិក និងសម្ព័ន្ធមិត្តរបស់ខ្លួន បានថ្កោលទោសយ៉ាងខ្លាំងចំពោះការធ្វើតេស្តទាំងពីរលើករបស់ទីក្រុងព្យុងយ៉ាង និងកំពុងពិចារណារកដំណោះស្រាយសមស្របទៅលើកូរ៉េខាងជើង កាលពីសប្ដាហ៍មុន៕
