នៅមុននេះបន្តិចថ្ងៃទី០៥ ខែសីហា ឆ្នាំ២០១៧ នេះ បើយោងតាមគណនីហ្វេសប៊ុក លោក ផែង វណ្ណះ បានបង្ហោះសារពាក់ព័ន្ធទៅនឹងករណី ធ្លាយឯកសារពីអគ្គនាយកដ្ឋានពន្ធដារ រឿងកាសែតអាមេរិក Cambodia Daily អត់បានបង់ពន្ធជូនរដ្ឋអស់រយះពេល១០ឆ្នាំ ដោយក្នុងនោះលោកបានសរសេរថា៖
ស្ទើរតែមិនគួរអោយជឿដែលកាសែត The Cambodia Daily មានម្ចាស់ជាជនជាតិអាមេរិកាំង តែងតែរឹះគន់រដ្ឋាភិបាកម្ពុជាឥតសំចៃ បែជាមករកស៊ីនៅស្រុកខ្មែរមិនបង់ពន្ធអោយរដ្ឋទៅវិញ ។ តាមរយៈលិខិតជូនដំណឹងស្ដីពីការកំណត់ពន្ធឡើងវិញរបស់អគ្គនាយកដ្ឋានពន្ធដារ បានអោយដឹងថា កាសែត The Cambodia Daily ជំពាក់ពន្ធរដ្ឋរហូតដល់ទៅ ២៥ ពាន់លានរៀល ស្មើនឹងជាង ៦០ម៉ឺនដុល្លារអាមេរិក ។ យើងរង់ចាំមើលតើ កាសែត The Cambodia Daily នឹងបង់ពន្ធជូនរដ្ឋនៅពេលណា ?
ភ្នំពេញ៖ ឯកសារសំខាន់មួយរបស់អគ្គនាយកដ្ឋានពន្ធដារ ចេញនៅថ្ងៃទី០៤ ខែសីហា ឆ្នាំ២០១៧ ម្សិលមិញនេះ ផ្ញើជូនកាសែតអាមេរិក Cambodia Daily ដោយជូនដំណឹងអំពីការជំពាក់ថ្លៃពន្ធរយៈពេល១០ឆ្នាំ ពីឆ្នាំ២០០៧ ដល់ឆ្នាំ ២០១៦ មានទឹកប្រាក់ 25,756,015,695 រៀល ត្រូវបានបែកធ្លាយនៅលើ បណ្តាញទំនាក់ទំនងសង្គម Facebook របស់លោក អ៊ូ ច័ន្ទរិទ្ធ តំណាងរាស្ត្រគណបក្សសង្គ្រោះជាតិ នៅយប់ថ្ងៃទី០៤ ខែសីហា ឆ្នាំ២០១៧នេះ។
នៅក្នុងគណនីហ្វេសប៊ុកផេក Ou Chanrith page បានបង្ហោះសារ និងលិខិតមួយច្បាប់ ដោយសរសេរថា៖
ខ្ញុំបាទ អ៊ូ ច័ន្ទរិទ្ធ ក្នុងនាមតំណាងរាស្ត្រគណបក្សសង្គ្រោះជាតិ ខ្ញុំសូមគាំទ្រគោលនយោបាយគៀងគចំណូលថវិការរបស់រាជរដ្ឋាភិបាល។ ហេតុនេះសូមឲ្យបងប្អូនអាជីវករ វិនិយោគិន ជាពិសេសសារព័ត៌មាន Cambodia Dialy ដែលមានលោក Bernard Krisher ជាថ្នាក់ដឹកនាំ សូមមេត្តាភ្ញាក់រលឹកបំពេញកាតព្វកិច្ចបង់ពន្ធអាករជូនរដ្ឋាភិបាលឲ្យបានរួសរាន់។
នៅក្នុងលិខិតរបស់អគ្គនាយកដ្ឋានពន្ធដារ ដែលចុះហត្ថលេខាដោយលោក ហេង ណារិទ្ធ នៅថ្ងៃទី០៤ ខែសីហានេះ បានសរសេរផ្ញើជូន នាយកសហគ្រាស៖ ប៊ែណាត គ្រីសឺ ជីម៉ូស្ស ឯ.ក BERNARD KRISHER JIMUSHO Co, LTD. អាស័យដ្ឋានសហគ្រាស៖ លេខ២៩ ផ្លូវ៨៤ សង្កាត់ស្រះចក ខណ្ឌដូនពេញ រាជធានីភ្នំពេញ»។ សហគ្រាសរបស់លោកត្រូវបានពិនិត្យបញ្ជីគណនេយ្យ និងរាល់កិច្ចប្រតិបត្តិការដែលកើតមានក្នុងការិយបរិច្ឆេទគណនេយ្យឆ្នាំ ២០០៧ ដល់ឆ្នាំ២០១៦ ជំពាក់ពន្ធរដ្ឋ 25,756,015,695 រៀល ប្រហាក់ប្រហែលជាង៦លានដុល្លាសហរដ្ឋអាមេរិក។
ពាក់ព័ន្ធករណីនេះ មិនទាន់មានការបំភ្លឺពីសារព័ត៌មាន Cambodia Daily នៅឡើយនោះទេ នៅថ្ងៃទី០៤ ខែសីហា ឆ្នាំ២០១៧នេះ។
កាសែត Cambodia Daily ត្រូវបានគេដឹងថា ជាកាសែតរបស់អាមេរិកាំង ហើយតែងតែចូលចិត្តសរសេររិះគន់ខ្លាំងៗទៅលើរដ្ឋាភិបាល និងចូលចិត្តសរសេរទម្លាយព័ត៌មានសំងាត់របស់រដ្ឋាភិបាលផងដែរ ប៉ុន្តែពេលនេះត្រូវបានបណ្តាញទំនាក់ទំនងសង្គមទម្លាយឯកសារអត់បង់ពន្ធនេះវិញហើយ៕
