Star របស់ Real Madrid កីឡាករ Cristiano Ronaldo ប្រហែលជាបើកទ្វារធ្វើការផ្ទេរចេញត្រឡប់ទៅអង់គ្លេសវិញហើយ ក្រោយបានសារភាពថាគាត់ចង់ត្រឡប់ទៅទីនោះវិញ អំឡុងពេលដែលតុលាការចោទប្រកាន់ពីបទក្លែងបន្លំពន្ធ។
អតីតកីឡាកររបស់ Manchester United ជាប់ទាក់ទងធ្វើការផ្ទេរមក Old Trafford វិញ២ ៣ដងរួចមកហើយ ដែលជាកន្លែងរូបគេចាប់អាជីពចន្លោះឆ្នាំ២០០៣ ដល់២០០៩។ កីឡាករវ័យ៣២ឆ្នាំនិយាយថាគាត់មិនដែលមានបញ្ហាអីបែបនេះទេ កាលលេងនៅអង់គ្លេស ហើយហេតុអ្វីថាមិនអាចឲ្យរូបគាត់សម្រេចចិត្តប្ដូរទៅទីនោះម្ដងទៀត បន្ទាប់ពីមានបញ្ហាក្នុងប្រទេសអេស្ប៉ាញបែបនេះ។
កាសែត Metro បានដកស្រងសម្ដីរបស់ Ronaldo និយាយក្នុងព្រឹត្តិបត្រ Cadena SER របស់អេស្ប៉ាញថា៖" ក្នុងប្រទេសអង់គ្លេសខ្ញុំមិនដែលមានបញ្ហាទេ នេះគឺហេតុផលដែលខ្ញុំគួរតែត្រឡប់ទៅវិញ។ ខ្ញុំតែងតែបង់ពន្ធ ទាំងនៅអង់គ្លេសនិងអេស្ប៉ាញ ហើយខ្ញុំតែងតែបង់ដូចអ្នកដឹងហើយ។ ខ្ញុំមិនអាចលក់អ្វីបានទេ ខ្ញុំហាក់បីដូចជាសៀវភៅដែលបើកស្រាប់ ទស្សនាវដ្ដី Forbes តែងតែទទួលបានព័ត៌មានថាខ្ញុំបានចំណូលចំនួនប៉ុណ្ណេះៗ។"
ប្រធានក្រុមជម្រើសជាតិព័រទុយហ្គាល់ប្រហែលត្រូវបានគេសន្និដ្ឋានទៅរស់នៅអង់គ្លេសម្ដងទៀតបន្ទាប់ពីអាជីពបាល់ទាត់របស់គេត្រូវបញ្ចប់។ Ronaldo នៅតែជាផ្នែកមួយសំខាន់របស់លោក Zidane បន្ទាប់ពីទាត់បញ្ចូលទីបាន៤២គ្រាប់ក្នុងការចូលលេង៤៦ប្រកួតដោយជួយ Real Madrid ឈ្នះChampions League និងLa liga៕
