អ្នកគាំទ្រក្រុមតោខៀវត្រូវរងចាំដល់នាទី៧៤ ទើបបានឃើញសកម្មភាពរបស់ Morata លេងទីលាន ប៉ុន្តែក្រោយពេលទាត់បាល់១១ម៉ែត្រកាត់សេចក្ដីមិនចូល ពួកគេបែរជានិយាយថា Morata សមតែអង្គុយកៅអីបម្រុងរហូត ក្រោយពេល Chelsea បានចាញ់ក្រុមកាំភ្លើងធំ Arsenal ក្នុងពានរង្វាន់បើករដូវកាល Conmmunity Shield។
ខ្សែប្រយុទ្ធតម្លៃខ្លួន៧០លានផោនទើបចុងកុងត្រាយកពី Real Madrid មិនបានជាប់ជម្រើសដំបូងនោះទេខណៈលោក Conte បានទុកចិត្តឲ្យខ្សែប្រយុទ្ធ Michy Batshuayi ដែលបង្ហាញខ្លួនក្នុង Pre-Season បានល្អដាក់លេងជម្រើសដំបូងជំនួសវិញ។
ទោះបីជាយ៉ាងនេះក្ដី ក្រោយខ្សែប្រយុទ្ធបែលហ្សិករូបនេះ លេងមិនសូវបានល្អក៏ត្រូវដកចេញវិញ ពេលចូលវគ្គទីពីរ ប៉ុន្តែមិនមែន Morata ទេរហូតដល់នាទី៧៤ទៀបមានឱកាសប្ដូរចូល។ បែបណាក្ដី! មានអ្នកគាំទ្រជាច្រើនបានស្នើសុំឲ្យលោក Conte នាំយក Diego Costa មកវិញខណៈអតីតខ្សែប្រយុទ្ធ At. Madrid ធ្លាប់បានប្រាប់ថារូបគេគ្មានអនាគតជាមួយក្លឹបទៀតទេ ទោះបីធ្លាប់ជួយឲ្យឈ្នះជើងឯក Premier League ២ដងក៏ដោយ។
ក្រោយបានឃើញទម្រង់លេងដ៏ពិបាករបស់ Morata និង Batshuayi កាលពីយប់មិញអ្នកគាំទ្ររបស់Chelsea គិតថា Conte គួរតែគិតពីការសម្រេចចិត្តម្ដងទៀត ខណៈក្លឹបដទៃទៀតមិនអាចឈប់នឹងសើចអំពីអ្វីដែលបានកើតឡើង៕
