ភ្នំពេញ៖ លោក ញិក ប៊ុនឆៃ ត្រូវបានបញ្ជូនទៅពន្ធនាគារហើយ នៅល្ងាចថ្ងៃទី០៦ ខែសីហានេះ ។ បន្ទាប់ពីលោក ញឹក ប៊ុនឆៃ ត្រូវបានកងកម្លាំងសមត្ថកិច្ចបញ្ជូនមកសាលាដំបូងរាជធានីភ្នំពេញ ដើម្បីបន្តសាកសួរ នៅម៉ោង០៥និង២០នាទីល្ងាចថ្ងៃទី០៦ សីហា ២០១៧នេះ ចៅក្រមស៊ើបសួរសាលាដំបូងរាជធានីភ្នំពេញ លោក លី លីបម៉េង បានសម្រេចចេញដីកាឃុំខ្លួនជាបណ្ដោះអាសន្ន ក្រោយព្រះរាជអាជ្ញា បានចោទប្រកាន់ចំនួន២បទល្មើស រួមមានបទល្មើសសមគំនិត និងនាំចូលសារធាតុសម្រាប់ផលិតគ្រឿងញៀន ។ នេះបើតាមការបញ្ជាក់របស់លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ ។
សេចក្ដីថ្លែងការណ៍របស់អយ្យការអមសាលាដំបូងរាជធានីភ្នំពេញ បញ្ជាក់ថា លោក ញិក ប៊ុនឆៃ អាយុ៥៩ឆ្នាំ ត្រូវបានចោទប្រកាន់ចំនួនពីរបទល្មើស គឺ បទសមគំនិតក្នុងបទផលិតគ្រឿងញៀន និង បទនាំចូលសារធាតុញៀនសម្រាប់ផ្សំគ្រឿងញៀន តាមមាត្រា២៩នៃក្រមព្រហ្មទណ្ឌ មាត្រា៣៨.១ថ្មី ចំណុចទី៤ និង មាត្រា៣២.១ថ្មី ចំណុច៤-ង នៃច្បាប់ស្ដីពីវិសោធនកម្មច្បាប់ស្ដីពីការត្រួតពិនិត្យគ្រឿងញៀន ឆ្នាំ២០០៥ ។
ការចោទប្រកាន់នេះត្រូវបានធ្វើឡើង បន្ទាប់ពីមានលិខិតចុះថ្ងៃទី២៤ ខែកក្កដា ឆ្នាំ២០១៧ របស់ទណ្ឌិតឈ្មោះ ជា ជុង ដែលបានបរិហាររៀបរាប់ឈ្មោះមេក្លោងផលិតគ្រឿងញៀនជាជនជាតិចិនមួយចំនួនផ្សេងទៀត ហើយមានចំណុចពាក់ព័ន្ធដល់ឈ្មោះ ញឹក ប៊ុនឆៃ នៅក្នុងសំណុំរឿងគ្រឿងញៀនដ៏ធំមួយកាលពីឆ្នាំ២០០៧ ។
កាលពីថ្ងៃទី០១ មេសា ឆ្នាំ២០០៧ សមត្ថកិច្ចបានឆែកឆេរទីតាំងកសិដ្ឋានចិញ្ចឹមគោមួយកន្លែង ស្ថិតនៅភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ដោយរកឃើញនូវឧបករណ៍ផលិតគ្រឿងញៀន និងសារធាតុញៀន ព្រមទាំងបានឃាត់ខ្លួនជនល្មើសជាជនជាតិខ្មែរ ជនជាតិចិន ជនជាតិថៃ នៅទីតាំងខាងលើ ។
សូមបញ្ជាក់ថា លោក ញឹក ប៊ុនឆៃ អតីតអនុប្រធានទី២ព្រឹទ្ឋសភា ទីប្រឹក្សារាជរដ្ឋាភិបាល ឧបនាយករដ្ឋមន្ត្រី សហរដ្ឋមន្ត្រីក្រសួងការពារជាតិ និងផ្កាយមាស៤ ត្រូវបានសមត្ថកិច្ចចាប់ខ្លួនកាលពីវេលាថ្ងៃត្រង់ថ្ងៃទី០៣ ខែសីហា ពាក់ព័ន្ឋនឹងការផលិតគ្រឿងញៀននៅស្រុកភ្នំស្រួច ខេត្តកំពង់ស្ពឺកាលពី១០ឆ្នាំមុន ៕
