ខេត្តកំពង់ចាម ៖ រឿងក្ដីមួយប្តឹងផ្ដល់គ្នាទៅដល់តុលាការ ហើយបានអូសបន្លាយពេលជិត៨ខែមកហើយ ដោយសារតែ ផឹកជុំគ្នា៥ទៅ៦នាក់ មានម្នាក់គាស់ត្រូវរង្វាន់ធំរថយន្តមួយគ្រឿង ពីក្រុមហ៊ុនស្រាបៀហ្គេនហ៍បឺគ Ganzberg តែលាក់មិនចែកឲ្យម្ចាស់លុយចេញថ្លៃទិញស្រាបៀរនោះឡើយ ទើបប្តឹងគ្នា រហូតសុំអោយក្រុមហ៊ុនផ្អាកផ្ដល់រង្វាន់រថយន្ត ។
ហេតុការណ៍នេះបានកើតឡើងតាំងពីថ្ងៃទី១ មករា ដើមឆ្នាំ២០១៧ ស្ថិតនៅភូមិស្លែង ឃុំជីបាល ស្រុកស្រីសន្ធរ ខេត្តកំពង់ចាម រហូតមកដល់បច្ចុប្បន្ននៅមិនទាន់ដោះស្រាយរួចនៅឡើយ ។
បើតាមលិខិតរបស់លោកមេធាវី សំ ម៉េងឌឿន ចុះថ្ងៃទី១៥ សីហា ២០១៧ នេះ សុំអោយក្រុមហ៊ុនហ្គេនហ៍បឺគ Ganzberg ផ្អាកបើករង្វាន់ធំជាបណ្តោះអាសន្ន រង់ចាំការសម្រេចរបស់តុលាការផ្ដល់យុត្តិធម៌ដល់កូនក្ដីរបស់ខ្លួនជាមុនសិន ។
ចំណែកឯដើមបណ្តឹងមានឈ្មោះ ហ៊ន ថៃ ភេទប្រុស អាយុ២២ឆ្នាំ មានមុខរបរជាកសិករ រស់នៅភូមិ-ឃុំកើតហេតុខាងលើ ។ ខាងក្រោមនេះជាដំណើររឿងដែលបានរៀបរាប់ក្នុងលិខិតរបស់លោកមេធាវី ៖
