រាជធានីភ្នំពេញ ៖ បុរសម្នាក់ជិះម៉ូតូដឹកមិត្តស្រីម្នាក់ ទៅដើរលេងនៅកោះពេជ្រ ត្រូវជនសង្ស័យមួយក្រុម ឆក់ទូរស័ព្ទ iPhone 7 មិនបានសម្រេច ត្រូវសមត្ថកិច្ច និងជនរងគ្រោះជិះដេញតាមចាប់ និងបាញ់ចំនួន ១គ្រាប់ និងជិះបំបុកទើបឃាត់ខ្លួនបាន ចំនួន ៣នាក់ ចំណែកម្នាក់ទៀតគេចខ្លួនបាត់ បង្កឲ្យមានការភ្ញាក់ផ្អើលដល់ប្រជាពលរដ្ឋចោមរោមមើល កាលពីវេលាម៉ោង១១និង២០នាទីយប់ ថ្ងៃទី០២ ខែសីហា ឆ្នាំ២០១៧ កន្លងទៅ តាមបណ្តោយផ្លូវកម្ពុជាក្រោមកែងផ្លូវ២២៥ ស្ថិតនៅក្នុងសង្កាត់ផ្សារដេប៉ូ២ ខណ្ឌទួលគោក ។ ករណីនេះ ក៏បានធ្វើឱ្យជនរងគ្រោះ ដួលម៉ូតូរងរបួសធ្ងន់ ផងដែរ ។
ជនសង្ស័យដែលឃាត់ខ្លួនបាន ទី១.ឈ្មោះ ស្រ៊ុន ឈុនទី ភេទប្រុស អាយុ១៦ឆ្នាំ មុខរបរសិស្សថ្នាក់ទី១១ នៅវិទ្យាល័យសន្ធរម៉ុក ស្នាក់នៅផ្ទះលេខ៥០B សង្កាត់ទឹកល្អក់៣ ខណ្ឌទួលគោក ទី២.ឈ្មោះ កុសល បញ្ញាសិទ្ធ ភេទប្រុស អាយុ១៤ឆ្នាំ មុខរបរជាសិស្សថ្នាក់ទី៨ នៅវិទ្យាល័យសន្ធរម៉ុក និងទី៣.ឈ្មោះ រេន សុខរតនៈ ភេទប្រុស អាយុ១៩ឆ្នាំ ជាសិស្សវិទ្យាល័យឥន្ទ្រទេវី ។ ចំណែកឯបក្ខពួកម្នាក់ទៀត មិនស្គាល់អត្តសញ្ញាណរត់គេចខ្លួនបាត់ ។
ជនរងគ្រោះមានឈ្មោះ សុខ មាន ភេទស្រី អាយុ១៩ឆ្នាំ មុខរបរបុគ្គលិកក្រុមហ៊ុនឯកជន ស្នាក់នៅផ្ទះជួលគ្មានលេខ នៅសង្កាត់ទឹកថ្លា ខណ្ឌសែនសុខ និងម្នាក់ទៀតមានឈ្មោះ បញ្ញា ភេទប្រុស អាយុ២២ឆ្នាំ ស្នាក់នៅសង្កាត់ទឹកថ្លា ខណ្ឌសែនសុខ ។
តាមប្រភពព័ត៌មានពីជនរងគ្រោះទាំង២នាក់ បានឲ្យដឹងថា ៖ មុនពេលកើតហេតុ គាត់២នាក់មិត្តភក្តិ បានជិះម៉ូតូម៉ាក Zoomer-X ពណ៌ខៀវលាយក្រហម ពាក់ស្លាកលេខ ភ្នំពេញ 1FO 6475 ឌុបគ្នាធ្វើដំណើរតាមបណ្តោយផ្លូវកម្ពុជាក្រោម ក្នុងទិសដៅពីលិចទៅកើត គោលបំណងចេញពីត្រឡោកបែក ទៅលេងកោះពេជ្រ ខណៈពេលជិះមកដល់ចំណុចកើតហេតុខាងលើ ក៏ស្រាប់តែលេចមុខជនសង្ស័យគ្នា៤នាក់ជិះម៉ូតូ២គ្រឿង ម៉ាកសង់បិច សេ១១០ ពណ៌ខ្មៅ ពាក់ស្លាកលេខ ភ្នំពេញ 1BD 4677 និងមួយគ្រឿងទៀត ម៉ាកស៊ីរ៉ូស ពណ៌លឿង ពាក់ស្លាកលេខ ភ្នំពេញ 1L 8044 បានជិះទៅជិត ហើយធ្វើសកម្មភាពឆក់ទូរស័ព្ទដៃ ពីបុរសរងគ្រោះ ដែលកំពុងតែលើកនិយាយ ម៉ាក iPhone 7 ប៉ុន្តែឆក់មិនបានសម្រេចនោះទេ ហើយព្យាយាមជិះគេចខ្លួន។
ជនរងគ្រោះក៏បានស្រែកថា ចោរៗ និងបានជិះដេញតាម ស្របពេលនោះ សមត្ថកិច្ចប៉ុស្តិ៍ផ្សារដេប៉ូ៣ កំពុងតែជិះល្បាតប្រទះឃើញ ក៏ដេញតាមជាមួយជនរងគ្រោះទៅដល់ចំណុចជិតស្តុបដេ DN ផ្លូវកម្ពុជាក្រោម ក្នុងសង្កាត់មិត្តភាព ខណ្ឌ៧មករា សមត្ថកិច្ច បានផ្ទុះអាវុធមួយគ្រាប់ រហូតជិះបំបុកម៉ូតូជនសង្ស័យ បណ្តាលឱ្យដួលទើបឃាត់ខ្លួនបានភ្លាមៗ ក៏ត្រូវសមត្ថកិច្ចឃាត់បាន២នាក់ ចំណែកឯ២នាក់ទៀត រត់គេចខ្លួន ហើយសមត្ថកិច្ចឃាត់បានជនសង្ស័យម្នាក់ទៀតឈ្មោះ រេន សុខរតនៈ យកទៅសួរនាំនៅប៉ុស្តិ៍ដេប៉ូ២ យកទៅសួរនាំ តែជនសង្ស័យទាំង៣នាក់ មិនព្រមឆ្លើយសារភាព ថាខ្លួនជាអ្នកធ្វើសកម្មភាពឆក់ទូរស័ព្ទដៃរបស់ជនរងគ្រោះនោះទេ ។ រីឯជនរងគ្រោះខាងប្រុសរងរបួសធ្ងន់ បែកក្បាលហូរឈាមស្រោចពេញមុខ តែមិត្តស្រីរងរបួសស្រាល ត្រូវរថយន្តសង្គ្រោះដឹកយកទៅព្យាបាលនៅគ្លិនិករស្មី ។
ចំណែកជនសង្ស័យ ត្រូវបានកម្លាំងសមត្ថកិច្ច យកទៅសួនាំនៅប៉ុស្តិ៍នគរបាលផ្សាដេប៉ូ២ ដើម្បីកសាងសំណុំរឿង បញ្ជូនទៅអធិការនគរបាលខណ្ឌទួលគោក ចាត់កាបន្តតាមនីតិវិធី៕
