ព័ត៌មានដោះដូរកីឡាករថ្ងៃនេះ មានកីឡាករពីរនាក់របស់ Manchester United ២រូបនឹងអាចចាកចេញពីOld Trafford គឺខ្សែការពារស្លាបជម្រើសជាតិអ៊ីតាលី Matteo Darmian និងខ្សែបម្រើ Juan Mata។
លោក Jose Mourinho បាននិយាយច្បាស់ហើយថា គាត់សប្បាយចិត្តជាមួយនឹងក្រុមកីឡាករបច្ចុប្បន្នរបស់គាត់ខ្លាំងណាស់ បើមិនមានការដាក់ស្នើសុំផ្ទេរចេញទេនោះ គឺគ្មាននរណាម្នាក់ឲ្យចាកចេញ។
ប៉ុន្តែតាមប្រភពបណ្ដាញផ្សព្វផ្សាយអ៊ីតាលី calciomercato.com បានរាយការណ៍ថា Darmian គឺជាគោលដៅរបស់ Bayern Munich និង Barcelona។ បែបណាក្ដី! គេមិនមានព័ត៌មានផ្លូវការណាមួយ បានផ្សព្វផ្សាយនៅឡើយទេ ខណៈក្លឹបជើងខ្លាំងនៅអឺរ៉ុបទាំងពីរនេះកំពុងបង្ហាញការចាប់អារម្មណ៍។
ចំណែកម្នាក់ទៀតគឺ កីឡាករលេងក្នុងជម្រើសដំបូងជាក់លាក់ Juan Mata។ មុនដំបូង កីឡាករសញ្ជាតិអេស្ប៉ាញមានព័ត៌មានចាកចេញពី Old Trafford ដោយសារលោក Jose Mnourinho មកដឹកនាំបិសាចក្រហម ប៉ុន្តែតាមពិតបញ្ហារបស់អ្នកទាំងពីរគ្រាន់តែជារឿងអតីតកាល ហើយរដូវកាលមុន ជួយក្លឹបលើកពានដល់ទៅ៣ទៀត។
ប៉ុន្តែរបាយការណ៍ចុងក្រោយបំផុតនោះគឺមកពីអ៊ីតាលីដូចគ្នា ដោយនិយាយថា Roma បានចាប់អារម្មណ៍កីឡាករវ័យ២៩ឆ្នាំ។ គ្រូបង្វឹកក្លឹបអ៊ីតាលីមួយនេះ លោក Eusebio Di Francesco កំពុងស្វែងរកខ្សែបម្រើថ្មី បន្ទាប់ពីពួកគេលក់ Muhamed Salah ឲ្យទៅ Liverpool កាលពីដើមរដូវកាលដោះដូរកីឡាករចំណែក Riyad Mahrez របស់ Leicester City ក៏ជារ៉ាដារបស់ Roma ដែរ។
ប៉ុន្តែបើតាមប្រភពរបស់អ៊ីតាលីមួយទៀតគឺ Corriere dello Sport និយាយថាគ្រូបង្វឹករូបនេះ ពេញចិត្តJuan Mata ជាង។ តែ Jose បាននិយាយច្បាស់ហើយថា គ្មានចំណាប់អារម្មណ៍លក់កីឡាករណាម្នាក់ក្នុងក្រុមរបស់លោកនោះទេ ដូច្នេះកីឡាករទាំងពីរមានភាគរយខ្ពស់បន្តលេងបាល់នៅ Old Trafford រដូវកាលក្រោយ៕
ប្រភព៖ manchestereveningnews
