ភ្នំពេញៈ ក្រសួងបរិស្ថាន នៅមុននេះបន្តិច បានចេញមុខបំភ្លឺចំពោះការសម្រេចផ្លាស់ប្ដូរឈ្មោះរបស់តំបន់ឧទ្យានជាតិប្រវត្តិសាស្ត្រនៅខេត្តកំពត ទៅជាឈ្មោះឯកជនកាលពីពេលថ្មីៗនេះ ដោយបញ្ជាក់ថា ឈ្មោះប្រវត្តិសាស្ត្ររបស់តំបន់រមណីយដ្ឋាន ភ្នំបូកគោ មិនត្រូវបានផ្លាស់ប្ដូរឡើយ ដោយត្រូវរក្សានូវឈ្មោះប្រវត្តិសាស្ត្ររបស់ខ្លួនដូចដើម។
ក្រសួងបរិស្ថាន នៅព្រឹកថ្ងៃទី២៣ ខែកញ្ញា ឆ្នាំ២០១៧ បានចេញសេចក្ដីបំភ្លឺថា "រមណីយដ្ឋានភ្នំបូកគោ ដែលមានទីតាំងស្ថិតនៅក្នុង «ឧទ្យានជាតិព្រះមុនីវង្សបូកគោ» នៅតែរក្សាឈ្មោះប្រវត្តិសាស្ត្ររបស់ខ្លួនដដែល ដោយមិនមានការផ្លាស់ប្ដូរទៅឈ្មោះផ្សេងឡើយ"។
បើតាមក្រសួងមួយនេះ ឧទ្យានជាតិព្រះមុនីវង្សបូកគោ ដែលមានទីតាំងស្ថិតនៅក្នុងភូមិសាស្ត្រខេត្តកំពត ព្រះសីហនុ និងខេត្តកំពង់ស្ពឺ មានផ្ទៃក្រឡាសរុបចំនួន១៥៤៤៥៨ហិកតា ត្រូវបានបង្កើតឡើងនៅឆ្នាំ១៩៩៣ ហើយក្រសួងបរិស្ថាន មានតួនាទីគ្រប់គ្រង ការពារ និងអភិរក្សធនធានធម្មជាតិ និងជីវៈចម្រុះនៅក្នុងឧទ្យានជាតិនេះឲ្យបានគង់វង្ស សម្រាប់មនុស្សជំនាន់តទៅមុខទៀត។
ការចេញមុខបំភ្លឺរបស់ក្រសួងបរិស្ថាន នៅពេលនេះ ធ្វើឡើងភ្លាមៗ បន្ទាប់ពីចំណាត់ការយ៉ាងបន្ទាន់មួយរបស់ប្រមុខរដ្ឋាភិបាលកម្ពុជា នាព្រឹកព្រលឹមថ្ងៃទី២៣ ខែកញ្ញានេះ បញ្ជាឲ្យអភិបាលខេត្តកំពត ចុះទៅដកចេញនូវស្លាកសញ្ញាឈ្មោះថ្មី ដែលសម្ដេចតេជោ ហ៊ុន សែន បានហៅថា «ជាស្លាកសញ្ញាអត់ច្បាប់»។
តំបន់រមណីយដ្ឋាន ភ្នំបូកគោ ដែលលោកឧកញ៉ា សុខ គង់ ទទួលសិទ្ធិវិនិយោគរយៈពេល៩៩ឆ្នាំនោះ ត្រូវបានក្រុមហ៊ុនរបស់លោកឧកញ៉ាម្ចាស់សណ្ឋាគារ សុខា និងក្រុមហ៊ុនប្រេងដ៏ធំនៅកម្ពុជា រូបនេះ ប្ដូរទៅជាឈ្មោះ រមណីយដ្ឋាន សុខា ឋានសួគ៌ ហើយធ្វើឲ្យមានការរិះគន់ពីគ្រប់មជ្ឈដ្ឋានរហូតដល់នាយករដ្ឋមន្ត្រីតែម្ដង។
"សូមអរគុណបងប្អូនជនរួមជាតិ ដែលបានឲ្យខ្ញុំដឹងពីការដូរឈ្មោះរមណីយដ្ឋានភ្នំបូកគោ ទៅជាឈ្មោះផ្សេង ដែលរាជរដ្ឋាភិបាល និងអាជ្ញាធរគ្រប់លំដាប់ថ្នាក់មិនបានដឹង និងមិនបានអនុញ្ញាត។ ខ្ញុំបានបញ្ជាឲ្យអភិបាលខេត្តកំពត ទៅដកហូតចេញនូវស្លាកសញ្ញាអត់ច្បាប់ ចេញឲ្យបានមុនម៉ោង១១ថ្ងៃនេះ។ តំបន់ប្រវត្តិសាស្ត្រ ត្រូវតែរក្សាឈ្មោះដើមជាដាច់ខាត"។ ប្រតិកម្ម និងចំណាត់ការរបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា។
បែបណាក៏ដោយ រហូតមកដល់ពេលនេះ អាជ្ញាធរខេត្តកំពត បាន និងកំពុងធ្វើការរុះរើស្លាកសញ្ញាឈ្មោះថ្មីនេះចេញ តាមបញ្ជាយ៉ាងបន្ទាន់របស់ប្រមុខដឹកនាំកម្ពុជាហើយដែរ។
សូមបញ្ជាក់ថា រមណីយដ្ឋានភ្នំបូកគោ មានកម្ពស់១០៧៥ម៉ែត្រ ស្ថិតនៅចម្ងាយ៤២គីឡូម៉ែត្រ ពីទីរួមខេត្តកំពត និងមានចម្ងាយជិត២០០គីឡូម៉ែត្រ ពីរាជធានីភ្នំពេញ។ ឧទ្យានជាតិ ភ្នំបូកគោ ត្រូវបានរកឃើញដោយជនជាតិបារាំងឈ្មោះ រូលួស ហើយត្រូវបានរៀបចំឡើងនៅថ្ងៃទី១៣ ខែមេសា ឆ្នាំ១៩២២ ក្នុងរជ្ជកាលព្រះបាទស៊ីសុវត្ថិ។ នៅក្នុងសម័យសង្គមរាស្ត្រនិយម មានសំណង់អគារសាធារណៈជាច្រើន ប្រៀបដូចជាទីក្រុងមួយដែរ។
រមណីយដ្ឋានភ្នំបូកគោ គឺជាតំបន់រមណីយដ្ឋានទេសចរណ៍ដ៏ទាក់ទាញ និងល្បាញល្បីនៅក្នុងប្រទេសកម្ពុជា លើទឹកដីនៃខេត្តកំពត។ រមណីយដ្ឋានដែលមានកម្ពស់កប់ពពកមួយនេះ មានកន្លែងសម្រាប់កម្សាន្ត និងលំហែកាយជាច្រើន ដូចជាទឹកជ្រោះពពកវិល, ថ្មមុខយក្ស ឬអ្នកថែរក្សាព្រៃ, បឹងលើភ្នំ, វត្តសំពៅប្រាំ, ព្រះវិហារកាតូលិកចាស់, ឡឺ បូកគោ ផាលេស (សណ្ឋាគារចាស់), ដំណាក់ស្លាខ្មៅ, ដំណាក់ព្រះបាទមុនីវង្ស ឬដំណាក់ស្តេច, វាលស្រែ៥០០ និងកន្លែងសមាធិ។
ក្រុមហ៊ុនសុខា ទទួលបានសិទ្ធិវិនិយោគពីរាជរដ្ឋាភិបាលកម្ពុជា កាលពីអំឡុងឆ្នាំ២០០៨ រយៈពេល៩៩ឆ្នាំ។ ក្រុមហ៊ុនបានធ្វើការអភិវឌ្ឍន៍តំបន់រមណីយដ្ឋានមួយនេះ យ៉ាងច្រើនដូចជា ការសាងសង់ផ្លូវ សាងសង់សណ្ឋាគារ និងសំណង់ផ្សេងៗ ដើម្បីធ្វើឲ្យតំបន់រមណីយដ្ឋានកាន់តែមានការទាក់ទាញបន្ថែមទៀត៕
