ភ្នំពេញៈ កើតមានរឿងដ៏រំជើបរំជួលថ្មីមួយទៀតហើយ ដែលប៉ូលិសជំនាញបាន និងកំពុងប្រតិបត្តិការតាមរកជនពាក់ព័ន្ធ បន្ទាប់ពីមានករណីប្រទះឃើញគ្រាប់បែកបង្កៃនៅក្នុងមន្ទីពេទ្យជោរ៉ៃ របស់វៀតណាម កាលពីយប់ថ្ងៃភ្ជុំធំ នៅថ្ងៃទី២០ ខែកញ្ញា ឆ្នាំ២០១៧កន្លងទៅ។
អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នាយឧត្តមសេនីយ៍ ជួន សុវណ្ណ បានប្រាប់ CAM POST ថា "ស្ទើរតែពេញមួយយប់ទៅហើយ ដែលប៉ូលិសមិនបានសម្រាកក៏ព្រោះតែតាមប្រម៉ាញ់ឧក្រិដ្ឋជនដែលដាក់បង្កៃគ្រាប់បែកនៅក្នុងបរិវេណមន្ទីរពេទ្យជោរ៉ៃ ក្រុងភ្នំពេញ ពីព្រោះជារឿងសន្តិសុខជាតិ ហើយពេលនេះ កំពុងតាមប្រមាញ់អ្នកពាក់ព័ន្ធ"។
បែបណាក៏ដោយ រហូតមកដល់ព្រឹកថ្ងៃទី២២ ខែកញ្ញានេះ ជនសង្ស័យជាម្ចាស់គ្រាប់បែកលាក់ក្រោមកែបម៉ូតូ យកទៅផ្ញើនៅកន្លែងទទួលផ្ញើម៉ូតូ នៅក្នុងមន្ទីរពេទ្យជោរ៉ៃ ត្រូវសមត្ថកិច្ចបញ្ជូនទៅដល់តុលាការក្រុងភ្នំពេញហើយ ដើម្បីធ្វើការសាកសួរ។ សំណុំរឿងនេះកំពុងស្ថិតក្នុងចំណាត់ការរបស់លោកព្រះរាជអាជ្ញារង ខាំ ផារី។
ជនសង្ស័យដែលត្រូវសមត្ថកិច្ចបញ្ជូនមកតុលាការនេះ មានឈ្មោះ ឡូ ប៉ិចដារិទ្ធ ភេទប្រុស អាយុ៣៣ឆ្នាំ មុខរបរជាបុគ្គលិកក្រុមហ៊ុនអូបា មានទីលំនៅផ្ទះជួល ភូមិបឹងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ។
ចំពោះករណីនេះដែរ ត្រូវបានអ្នកនាំពាក្យនគរបាលជាតិ នាយឧត្តមសេនីយ៍ គៀត ច័ន្ទថារិទ្ធ ច្រានចោល ថាជាករណីបង្កៃគ្រាប់បែក ដោយលោកចាត់ទុកថា ជាករណីកាន់កាប់គ្រឿងផ្ទុះដោយខុសច្បាប់ប៉ុណ្ណោះ។
លោក គៀត ច័ន្ទថារិទ្ធ បញ្ជាក់កាលពីថ្ងៃទី២១ ខែកញ្ញាថា តាមការស្រាវជ្រាវជំហានដំបូង មុខសញ្ញាដែលជាម្ចាស់ម៉ូតូ ត្រូវបានបងថ្លៃឲ្យយកគ្រាប់បែកទៅបន្ទាយនៅខាងលិចកំពង់ស្ពឺ ម្តុំត្រែងត្រយឹង កំពង់សិលា ប៉ុន្តែដោយសារឪពុកឈឺធ្ងន់នៅមន្ទីរពេទ្យជោរ៉ៃ អ៊ីចឹងម្ចាស់ម៉ូតូបានដាក់គ្រាប់បែកនៅក្នុងឃ្លុបម៉ូតូស្កុបពី ហើយដោយសារប្រញ៉ាប់ចូលទៅមើលឪពុកពេលដែលយកម៉ូតូទៅផ្ញើក៏មិនបានដកសោម៉ូតូ អញ្ចឹងហើយសន្តិសុខដែលយាមការពារនៅមន្ទីរពេទ្យ បានយកសោម៉ូតូទៅចាក់បើកឃ្លុបម៉ូតូ ដើម្បីឆែកមើលក្រែងលមានអីវ៉ាន់។ ពេលនោះក៏ឃើញមានថង់មួយ រួចក៏យកថង់ហ្នឹងក្នុងចេតនាចង់យករបស់គេ។ បន្ទាប់ពីយកថង់នោះចេញឆ្ងាយពីម៉ូតូរួចមក ក៏ឆែកទៅឃើញគ្រាប់បែក ក៏ភ័យរួចក៏យកទៅទម្លាក់នៅក្បែរម៉ូតូវិញ ហើយក៏ស្រែកប្រកូកប្រកាសថា រកឃើញគ្រាប់បែកគេដាក់នៅក្បែរម៉ូតូ ហើយក៏មានការផ្អើលឆោឡោឡើង បន្ទាប់មកសមត្ថកិច្ចក៏បានទៅយកគ្រាប់បែកនោះមករក្សាទុក។
សមត្ថកិច្ចបានប្រាប់ថា មនុស្ស២នាក់ ត្រូវប៉ូលិសហៅយកទៅសួរនាំភ្លាមៗ នៅការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលក្រុងភ្នំពេញ ដោយមានម្នាក់ជាអ្នកយាមម៉ូតូ និងម្នាក់ទៀត ជាម្ចាស់ម៉ូតូ។
គួរជម្រាបថា នៅម៉ោងប្រមាណជាង១០យប់ ថ្ងៃទី២០កញ្ញា ២០១៧នេះ មានការភ្ញាក់ផ្អើលមួយបានកើតឡើងនៅឆ្ងាយមិនប៉ុន្មានពីគល់ស្ពានច្បារអំពៅ ស្ថិតក្នុងបរិវេណមន្ទីរពេទ្យជោរ៉ៃ របស់ប្រទេសវៀតណាម តាមបណ្តោយផ្លូវជាតិលេខ១ ភូមិបឹងឈូក សង្កាត់និរោធ ខណ្ឌច្បារអំពៅ ក្រុងភ្នំពេញ។
តាមសេចក្តីរាយការណ៍ដដែល មុនដំបូងឡើយ គឺសន្តិសុខយាមម៉ូតូមន្ទីរពេទ្យជោរ៉ៃ បានប្រទះឃើញគ្រាប់បែក១គ្រាប់ ពណ៌ខ្មៅ រុំស្គុតសពីក្រៅ នៅក្បែរកង់ម៉ូតូផ្នែកខាងក្រោយ (ម៉ូតូម៉ាក ស្កុបពី ពណ៌ក្រហម ពាក់ស្លាកលេខ ភ្នំពេញ 1BE-7901)។ ដោយសន្តិសុខស្មានតែជាឆ្នាំងសាកទូរស័ព្ទដៃ ក៏ដើរទៅរើស និងបំភ្លឺភ្លើងមើល ទើបដឹងថា ជាគ្រាប់បែក។ ពេលនោះ ក៏យកទៅទុកលើតុ រួចក៏រាយការណ៍ប្រាប់អនុប្រធានមន្ទីរពេទ្យ និងបន្តរាយការណ៍ប្រាប់សមត្ថកិច្ចនគរបាលខណ្ឌច្បារអំពៅ ឲ្យចុះមកធ្វើការត្រួតពិនិត្យនៅកន្លែងកើតហេតុ ហើយក៏ដកហូតបានគ្រាប់បែក១គ្រាប់ខាងលើ និងត្រួតពិនិត្យក្នុងឃ្លុបម៉ូតូដែលគ្រាប់បែកនៅខាងក្រោម ពេលនោះឃើញមានប្រអប់ក្រដាសពណ៌ស-លាយខៀវ បិទស្កុត ពណ៌ស១ប្រអប់ថែមទៀត។
តាមសេចក្តីរាយការណ៍ដដែល សមត្ថកិច្ចបានធ្វើការដកហូត វត្ថុតាង (គ្រាប់បែក និងប្រអប់០១) រួមនឹងម៉ូតូ ព្រមទាំងអញ្ជើញម្ចាស់ម៉ូតូឈ្មោះ ឡូ ពិនដារិទ្ធ ភេទប្រុស អាយុ៣៣ឆ្នាំ មុខរបរបុគ្គលិកក្រុមហ៊ុនអូបា ស្នាក់នៅផ្ទះជួល ភូមិបឹងឈូក សង្កាត់ទឹកថ្លា ខណ្ឌសែនសុខ និងសន្តិសុខយាមម៉ូតូឈ្មោះ ញឹម ឌីយ៉ាម៉ង ភេទប្រុស អាយុ២៩ឆ្នាំ មុខរបរសន្តិសុខ ស្នាក់នៅភូមិកោះបៀន ឃុំគគីរ ស្រុកកៀនស្វាយ ខេត្តកណ្តាល មកអធិការដ្ឋានខណ្ឌច្បារអំពៅ ដើម្បីធ្វើការសាកសួរ រួចក៏បញ្ជូនទៅស្នងការក្រុង។ ចំណែកគ្រាប់បែក និងប្រអប់ក្រដាស ក៏ត្រូវបានខាងស៊ីម៉ាក់ត្រួតពិនិត្យហើយផងដែរ៕
