បារាំង៖ នៅក្នុងឱកាសពិព័រណ៍សម្លៀកបំពាក់ “APPAREL SOURCING PARIS 2017” និងកម្មវិធីបង្ហាញម៉ូត “READY-TO-WEAR CATWALK SHOW” កាលពីថ្ងៃទី២០ ខែកញ្ញា ឆ្នាំ២០១៧ នាទីក្រុងប៉ារីស ដែលចូលរួមពីបណ្តាប្រទេសមកពីសហគមន៍អឺរ៉ុប កម្ពុជា វៀតណាម និងមីយ៉ាម៉ានោះ សម្លៀកបំពាក់របស់កម្ពុជា ត្រូវបានទទួលនូវការចាប់អារម្មណ៍យ៉ាងខ្លាំងជាងគេ។
ការបញ្ជាក់ថាមានការចាប់អារម្មណ៍នោះ នៅត្រង់ថា ភ្ញៀវអ្នកទស្សនាទាំងអស់បាននាំគ្នាទះដៃអបអរសាទរតាំងពីការដើមដំបូងរហូតដល់ទីបញ្ចប់។ ម៉ូតសម្លៀកបំពាក់ខ្មែរនាពេលនោះ ត្រូវបានមើលឃើញថា ស្អាត ទាន់សម័យ មានគុណភាពល្អ ហើយអាចប្រកួតប្រជែងបានក្នុងទីផ្សារអឺរ៉ុបទៀតផង។ នេះបើយោងតាមការអះអាងរបស់ក្រសួងពាណិជ្ជកម្ម។
បន្ថែមពីភាពលេចធ្លោនៃសម្លៀកបំពាក់កម្ពុជាក្នុងកម្មវិធីបង្ហាញម៉ូតនោះ បានធ្វើឱ្យគណៈកម្មការរៀបចំកម្មវិធីក្រោកឈរឡើងថ្លែងកោតសរសើរយ៉ាងខ្លាំងដល់កម្ពុជា ហើយនៅពេលនោះមានតែប្រទេសកម្ពុជាតែមួយគត់ ដែលមានរដ្ឋមន្រ្តីក្រសួងពាណិជ្ជកម្ម គណៈប្រតិភូកម្ពុជា និងម្ចាស់ក្រុមហ៊ុនឌីហ្សាញម៉ូតសម្លៀកបំពាក់ NATACHA VAN ត្រូវបានអញ្ជើញជាភ្ញៀវកិត្តិយសឡើងមកលើឆាក ដើម្បីថតរូបជុំគ្នាទុកជាអនុស្សាវរីយ៍។
ភាពជោគជ័យដ៏ធំធេងនេះ នឹងជួយឱ្យកាន់តែមានការគាំទ្រ និងមានការបញ្ជារទិញផលិតផលសម្លៀកបំពាក់ និងវាយនភ័ណ្ឌកម្ពុជាកាន់តែច្រើនឡើងៗពីបណ្តាប្រទេសមកពីសហគមន៍អឺរ៉ុប អាមេរិក កាណាដា និងអាស៊ីជាច្រើនទៀត។
