សមាជិកព្រឹទ្ធសភាជាន់ខ្ពស់អាមេរិក បានប្រាប់ឲ្យដឹងថា លោក ដូណាល់ ត្រាំ កំពុងដឹកនាំសហរដ្ឋអាមេរិក ឆ្ពោះទៅរកសង្គ្រាមលោកលើកទី០៣ ហើយការដឹកនាំបច្ចុប្បន្ន គឺសម្របសម្រួលសម្រាប់កម្មវិធីទូរទស្សន៍ ជាជាងសេតវិមាន។ នេះយោងតាមគេហទំព័រសារព័ត៌មាន រុស្ស៊ី (RT) បានចុះផ្សាយនាព្រឹកថ្ងៃច័ន្ទ ទី០៩ ខែតុលា ឆ្នាំ២០១៧។
សមាជិកព្រឹទ្ធសភាជាន់ខ្ពស់អាមេរិកលោក Bob Corker មកពីគណបក្សសាធារណរដ្ឋ បានគូសបញ្ជាក់ថា “លោក ដូណាល់ ត្រាំ បារម្ភពីខ្ញុំ…គាត់បារម្ភពីអ្នករាល់គ្នា ដែលគិតគូរពីប្រទេសរបស់យើង”។ លោក បានបង្ហាញពីការសង្ស័យ ចំពោះសមត្ថភាពដឹកនាំប្រទេសរបស់ លោក ដូណាល់ ត្រាំ ផងដែរ ដោយបានបន្ទោសថា បានដឹកនាំប្រទេសដូចជាកម្មវិធីទូរទស្សន៍ ព្រមទាំងចេញមុខព្រមានឥតឈប់ឈរលើបណ្ដាប្រទេសដទៃ ដែលនេះ គឺជាផ្លូវនាំសហរដ្ឋអាមេរិក ទៅកាន់សង្រ្គាមលោកលើកទី០៣។
ជុំវិញបញ្ហានេះ លោក Bob Corker ធ្វើការកត់សម្គាល់បន្ទាប់ពី លោក ដូណាល់ ត្រាំ បានចេញមុខជាថ្មីព្រមានកូរ៉េខាងជើង ដោយបញ្ជាក់ថា ដំណោះស្រាយតែមួយគត់នឹងត្រូវ អនុវត្តជាមួយទីក្រុងព្យុងយ៉ាង ដោយការប្រើប្រាស់កម្លាំងយោធា ប្រសិនបើកូរ៉េខាងជើង កាន់តែបង្ហាញភាពគឃ្លើនខ្លាំងជាងសព្វថ្ងៃនេះទៀត៕
