ភ្នំពេញៈ រថយន្តហាយឡែនឌ័រមួយគ្រឿង ប្រើប្រាស់ល្បឿនលឿនពេក បានរេចង្កូតទៅបុកខឿនរង្វង់មូលព្រហ្មមុខបួន បណ្ដាលឲ្យរថយន្តដាច់កង់មុខម្ខាង បង្កឲ្យមានការភ្ញាក់ផ្អើលកាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី១៦ ខែតុលា ឆ្នាំ២០១៧ ស្ថិតតាមបណ្តោយផ្លូវលេខ6A សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
អ្នកឃើញហេតុការណ៍ បានឲ្យដឹងថា មុនពេលកើតហេតុ គេឃើញបុរសម្នាក់ និងអ្នករួមដំណើរពីរបីនាក់ទៀត បើករថយន្តហាយឡែនឌ័រមួយគ្រឿង ពណ៌ស្ករ គ្មានស្លាកលេខ បើកល្បឿនលឿនក្នុងទិសដៅពីកើតទៅលិច ខណៈមកដល់ចំណុចកើតហេតុ បានរេចង្កូតទៅបុកខឿនរង្វង់មូលព្រហ្មមុខបួនពេញទំហឹង បណ្តាលឲ្យរថយន្តរងការខូចខាតដាច់ក្រឡេកង់ បើកទៅមុខលែងរួច ចំណែកម្ចាស់រថយន្ត និងអ្នករួមដំណើរខាងលើ ត្រូវបានរថយន្តមួយគ្រឿងទៀតមកដឹកចេញពីកន្លែងកើតហេតុ។
ក្រោយកើតហេតុ សមត្ថកិច្ចជំនាញចរាចរណ៍ បានចុះមកវាស់វែងយករថយន្តទៅរក្សាទុកនៅនៃការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំម្ចាស់ រថយន្តចូលមកធ្វើការដោះស្រាយតាមផ្លូវច្បាប់៕
