ស្វាយរៀងៈ មនុស្សប្រុសស្រី៣នាក់ បានរងរបួសធ្ងន់២នាក់ និងស្លាប់ម្នាក់ ដោយសារយុវជនម្នាក់ ជិះម៉ូតូយ៉ាងលឿនគេចមិនទាន់ បុកម៉ូតូមួយគ្រឿងទៀតពីក្រោយពេញទំហឹងដួលខ្ទាតមនុស្សអូសជាង១០ម៉ែត្រ។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១២និង៥០នាទីថ្ងៃទី ២៤ ខែតុលា ឆ្នាំ២០១៧ នៅលើផ្លូវជាតិលេខ១ ចន្លោះគីឡូម៉ែត្រលេខ143-144 ស្ថិតនៅភូមិដើមពោធិ៍ ឃុំ ស្វាយតាយាន ស្រុកកំពង់រោទិ៍ ខេត្តស្វាយរៀង។
សមត្ថកិច្ច បានឲ្យដឹងថា មុនពេលកើតហេតុ គេឃើញបើកបរម៉ូតូមួយគ្រឿងម៉ាក ហុងដាឌ្រីម ស៊េរីឆ្នាំ2015 ពណ៌ខ្មៅ ស្លាកលេខ ស្វាយរៀង 1H 7052 បើកបរដោយឈ្មោះ ផាត វីរៈ ភេទប្រុស អាយុ២៣ឆ្នាំ មុខរបរកសិករ រស់នៅភូមិ ត្រពាំងត្រាច ឃុំស្វាយតាយាន ស្រុកកំពង់រោទិ៍ ខេត្តស្វាយរៀង ទិសដៅពីកើតទៅលិចលឿនដូចហោះ លុះមកដល់ត្រង់ចំណុចកើតហេតុខាងលើ បានបុកម៉ូតូម៉ាក ហុងដាឌ្រីម ស៊េរីឆ្នាំ2010 ពណ៌ខ្មៅ ស្លាកលេខ ស្វាយរៀង 1I-1050 ពីក្រោយបើកបរដោយឈ្មោះ អ៊ុក សារឿន ភេទប្រុស អាយុ៦៥ឆ្នាំ មុខរបរកសិករ រស់នៅភូមិ ស្វាយតាយាន ឃុំស្វាយតាយាន ស្រុកកំពង់រោទិ៍ ខេត្តស្វាយរៀង និងអ្នករួមដំណើរឈ្មោះ អន ហ៊ន ភេទស្រី អាយុ៦៦ឆ្នាំ មុខរបរ កសិករ រស់នៅភូមិឃុំជាមួយគ្នា។
សមត្ថកិច្ចបានបន្តថា គ្រោះថ្នាក់ចរាចរណ៍នេះ បណ្តាលឲ្យឈ្មោះ អ៊ុក សារឿន ភេទប្រុស អាយុ៦៥ឆ្នាំ ស្លាប់ និងអ្នករួមដំណើរឈ្មោះ អន ហ៊ន ភេទស្រី អាយុ៦៦ឆ្នាំ រងរបួសធ្ងន់។ ចំណែកអ្នកបើកបរម៉ូតូបង្កឈ្មោះ ផាត វីរៈ ភេទប្រុស អាយុ២៣ឆ្នាំ ក៏របួសធ្ងន់ ត្រូវបានដឹកបញ្ជូនទៅមន្ទីរពេទ្យបង្អែកជីភូ។
ក្រោយកើតហេតុម៉ូតូទាំងពីរគ្រឿង ត្រូវបានសមត្ថកិច្ចអូសយកមករក្សាទុកនៅអធិការដ្ឋានគរបាលស្រុកស្វាយទាប រង់ចាំដោះស្រាយគ្នាពេលក្រោយ៕
