រាជធានីភ្នំពេញ ៖ តារាចម្រៀង និង សម្ដែង ហើយពូកែរាំកន្ត្រាក់ គ្រលែងខ្លួនបែបសិចស៊ី អ្នកនាង ទូច ស្រីលក្ខណ៍ បានបើករថយន្តស៊េរីទំនើប បុកម៉ូតូមួយគ្រឿង អូសប្រហែល៣០០ម៉ែត្រ ប៉ុន្តែសំណាងល្អ អ្នកជិះម៉ូតូរងរបួសស្រាលប៉ុណ្ណោះ។ អ្នកនាង ទូច ស្រីលក្ខណ៍ ជិះរថយន្ដ ម៉ាក BMW, ចំណែកបុរសម្នាក់ ដែលរងគ្រោះ ជិះម៉ូតូ Dream C125 ។
ហេតុការណ៍នេះកើតឡើង នៅវេលាម៉ោង១៖៣០នាទី រំលងអធ្រាត្រឈានចូល ថ្ងៃទី២៥ ខែតុលា ឆ្នាំ២០១៧ តាមបណ្ដោយផ្លូវ២១៧ កែងនឹងផ្លូវវេងស្រេង ក្បែរ បញ្ជាការដ្ឋានកងរាជអាវុធហត្ថ រាជធានីភ្នំពេញ ស្ថិតក្នុងសង្កាត់ស្ទឹងមានជ័យ ខណ្ឌមានជ័យ។ អ្នកឃើញហេតុការណ៍ បានឲ្យដឹងថា មុនពេលកើតហេតុ គេឃើញតារាចម្រៀង-សម្ដែង អ្នកនាង ទូច ស្រីលក្ខណ៍ បានបើករថយន្តស៊េរីទំនើបមួយគ្រឿង ម៉ាក BMW ពាក់ស្លាកលេខភ្នំពេញ 2AB-3288 បើកពីត្បូងទៅទិសខាងជើង ខណៈមកដល់ចំណុចកើតហេតុ ស្រាប់តែមានម៉ូតូ Dream C125 ឆ្នាំ២០១២ ពណ៌ពាក់ស្លាកលេខ កំពង់ធំ 1D-6904 បើកបរដោយបុរសម្នាក់ ពីកើត ទៅលិច ក្នុងល្បឿនលឿនដូចគ្នា បុកគ្នាយ៉ាងពេញទំហឹង បណ្ដាលឲ្យម្ចាស់ម៉ូតូខ្ទាតចេញទៅម្ខាង រងរបួសស្រាល ហើយរថយន្ត បានអូសម៉ូតូប្រហែល៣០០ម៉ែត្រ ទើបប្រជាពលរដ្ឋដេញពីក្រោយ ធ្វើការឃាត់បានទាំងរថយន្តទាំងម្ចាស់រថយន្តតែម្ដង។
ទោះយ៉ាងណាក៏ដោយ ក្រោយកើតហេតុ ភាគីទាំងពីរ បានសម្របសម្រួលគ្នា ដោយភាគីខាងរថយន្តព្រមផ្ដល់សំណងថ្លៃព្យាបាល និងជួសជុលម៉ូតូ ទៅជនរងគ្រោះទាំងអស់ ដើម្បីបញ្ចប់រឿង៕
