មេដឹកនាំកំពូលរុស្ស៊ី បានប្រាប់ឲ្យដឹងថា វិមានក្រឹមឡាំង ត្រៀមខ្លួន ដើម្បីបង្កើតប្រព័ន្ធការពារសេរីថ្មី និងអាវុធនុយក្លេអ៊ែរ បន្ថែមទៀត ដើម្បីទុកឆ្លើយតបទៅនឹងប្រទេសដទៃទៀត ដែលធ្វើដូចគ្នា។ នេះបើយោងតាមគេហទំព័រសារព័ត៌មាន អង់គ្លេស (Express) បានចុះផ្សាយនាព្រឹកថ្ងៃសុក្រ ទី២០ ខែតុលា ឆ្នាំ២០១៧។
មេដឹកនាំកំពូលរុស្ស៊ី លោក វ្លាឌី មៀរពូទីន បាននិយាយថា ប្រទេសរុស្ស៊ី សន្យាថានឹងលុបចោលនូវសន្ធិសញ្ញាគ្មានអាវុធនុយក្លេអ៊ែរដ៏សំខាន់ដែលត្រូវបានចុះហត្ថលេខា ដើម្បីបន្ថយការគំរាមកំហែងសង្គ្រាមនុយក្លេអ៊ែរ កាលពីឆ្នាំ១៩៨៧ ប្រសិនបើសហរដ្ឋអាមេរិក នៅតែបន្តបង្កើតអាវុធនុយក្លេអ៊ែរបន្ថែមទៀត។ នៅរសៀលថ្ងៃនេះ សេចក្ដីថ្លែងការណ៍របស់លោក ពូទីន នាទីក្រុងសូជី ប្រទេសរុស្ស៊ី បានឲ្យដឹងថា ទីក្រុងម៉ូស្គូ បានត្រៀមខ្លួនរួចជាស្រេចក្នុងការអភិវឌ្ឍប្រព័ន្ធការពារសេរីថ្មី និងអាវុធនុយក្លេអ៊ែរ បន្ថែមទៀត ដើម្បីទុកឆ្លើយតបទៅនឹងប្រទេសដទៃទៀត ដែលធ្វើដូចគ្នា។
គួរបញ្ជាក់ផងដែរថា នៅឆ្នាំ១៩៨៧ សហរដ្ឋអាមេរិក និងប្រទេសរុស្ស៊ី បានចុះហត្ថលេខាលើសន្ធិសញ្ញាគ្មានអាវុធនុយក្លេអ៊ែរ INF ដែលបានហាមឃាត់ការសាងសង់ ឬអភិវឌ្ឍកម្មវិធីនុយក្លេអ៊ែរ ក៏ដូចជាកាំជ្រួចមីស៊ីល ដែលមានរយៈចម្ងាយរហូតដល់ ៥ពាន់គីឡូម៉ែត្រ៕
