សមាជិកសភាកូរ៉េខាងជើង បានប្រាប់ឲ្យដឹងថា ប្រវត្តិសាស្ត្រពីមុន បង្ហាញពីភស្តុតាង អំពីការគំរាមកំហែង និងការបំផ្លិចបំផ្លាញ ដែលសហរដ្ឋអាមេរិក ធ្វើដាក់ទីក្រុងព្យុងយ៉ាង។ នេះបើយោងតាមគេហទំព័រសារព័ត៌មាន Sputnik បានចេញផ្សាយនាព្រឹកថ្ងៃច័ន្ទ ទី១៦ ខែតុលា ឆ្នាំ ២០១៧។
សមាជិកសភាកូរ៉េខាងជើង លោក An Tong Chun បាននិយាយថា ប្រវត្តិសាស្ត្រពីមុន បង្ហាញពីភស្តុតាងថា យើងគួរតែការពារខ្លួនផ្ទាល់ ដោយអភិវឌ្ឍកម្មវិធីនុយក្លេអ៊ែរ សម្រាប់ទប់ស្កាត់ការឈ្លានពានសារជាថ្មីរបស់ប្រទេសមហាអំណាចនេះ។ លោកបានបន្ថែមទៀតថា កូរ៉េខាងជើង ត្រូវតែការពារខ្លួន និងអភិវឌ្ឍកម្មវិធីនុយក្លេអ៊ែររបស់ខ្លួន ពីព្រោះអត្ថិភាពរបស់ប្រទេសយើង គឺស្ថិតនៅក្នុងហានិភ័យ ដោយសារសកម្មភាពសង្គ្រាមរបស់សហរដ្ឋអាមេរិក។
ជុំវិញបញ្ហានេះ កូរ៉េខាងជើង បានថ្កោលទោសអាមេរិក ទាក់ទងការហោះហើររបស់យន្តហោះទម្លាក់គ្រាប់បែក B-1B ចំនួន០២គ្រឿង យន្តហោះចម្បាំងកូរ៉េខាងត្បូង F-15K ចំនួន០៦គ្រឿង និងយន្តហោះយោធាជប៉ុន F-15s ចំនួន០២គ្រឿង មកកាន់អន្តរកូរ៉េ ចំពេលមានការភ័យខ្លាចនៃសង្គ្រាមលោកលើកទី០៣ នឹងកើតឡើង៕
