បន្ទាប់ពីហេតុការណ៍បាញ់ប្រហារដ៏រន្ធត់ បណ្ដាលឲ្យមនុស្សស្លាប់កើនដល់៥៩នាក់ និងរបួស៥២៥នាក់ កាលពីថ្ងៃទី០២ ខែតុលា ឆ្នាំ២០១៧ ប្រធានាធិបតីអាមេរិក លោក ដូណាល់ ត្រាំ បានប្រកាសថា លោកនឹងធ្វើដំណើរទៅទីក្រុង Las Vegas ថ្ងៃទី០៤ ខែតុលានេះ ដើម្បីសួរសុខទុក្ខ និងជួបជាមួយសាច់ញាតិជនរងគ្រោះ។ បើយោងតាមសេចក្ដីរាយការណ៍របស់ CNN បានចុះផ្សាយនាពេលថ្មីៗនេះ។
លោក ដូណាល់ ត្រាំ បានចេញបញ្ជាឲ្យបង្ហោះទង់ជាតិត្រឹមពាក់កណ្ដាលប៉ុណ្ណោះ ដើម្បីចូលរួមរំលែកទុក្ខក្រៀមក្រំដល់ជនរងគ្រោះ ដែលត្រូវបានខ្មាន់កាំភ្លើងបាញ់សម្លាប់។ ទោះជាយ៉ាងនេះក្ដី ប្រធានាធិបតីរូបនេះ មិនបានលុបចោលគម្រោងធ្វើដំណើរទៅកាន់ កោះ Puerto Rico ដើម្បីធ្វើការវាយតម្លៃទៅលើផលខូចខាត ដែលបណ្ដាលមកពីព្យុះ Hurricane Maria នោះទេ។
សូមបញ្ជាក់ថា ការបាញ់ប្រហារដ៏សាហាវ ព្រៃផ្សៃនេះ បានកើតឡើងនៅអំឡុងការប្រគំតន្ត្រី ដ៏ធំមួយក្នុងទីក្រុង ឡាស វេហ្គាស (Las Vegas) នៃរដ្ឋណេវ៉ាដា (Nevada) ភាគខាងលិចសហរដ្ឋអាមេរិក។ រីឯប៉ូលិសអាមេរិក ក៏បានអះអាងដែរថា ជនសង្ស័យម្នាក់ ឈ្មោះ Stephen Paddock អាយុ៦៤ឆ្នាំ ត្រូវបានបាញ់សម្លាប់ បន្ទាប់ពីជននោះបើកការបាញ់ប្រហារយ៉ាងកម្រោលទៅលើក្រុមមនុស្សយ៉ាងច្រើនកុះករ ដែលបាននាំគ្នាទៅចូលរួមក្នុងពិធីបុណ្យប្រគំតន្ត្រីដ៏ធំមួយ ស្ថិតនៅក្បែរសណ្ឋាគារ-កាស៊ីណូ ម៉ាន់ដាឡាយ បេយ (Mandalay Bay)។
មកដល់ពេលនេះកម្លាំងប៉ូលិសអាមេរិក កំពុងធ្វើការស៊ើបអង្កេត ដើម្បីស្វែងរកមូលហេតុ នៅពីក្រោយហេតុការណ៍បាញ់ប្រហារហ្វូងមនុស្សម្នាដ៏សាហាវនេះ ដែលបានកើតឡើងចំយប់ថ្ងៃចុងក្រោយ នៃពិធីបុណ្យប្រគំតន្ត្រីមានឈ្មោះថា Route 91 Harvest ដែលមានរយៈពេលសរុប០៣ថ្ងៃ។ ព្រមពេលជាមួយគ្នានេះ អ្នកដែលបានទទួលរងរបួសទាំងប៉ុន្មានត្រូវបាន បញ្ជូនទៅកាន់មន្ទីរពេទ្យ ដើម្បីជួយសង្គ្រោះជីវិត៕
