តាមប្រភពស៊ើបការណ៍សម្ងាត់ពីកូរ៉េខាងត្បូង និងអាមេរិក បានឲ្យដឹងថា នៅថ្ងៃបុណ្យជាតិនាពេលខាងមុខរបស់កូរ៉េខាងជើង ក្រុងព្យុងយ៉ាង បានបញ្ជូនមីស៊ីលពីកន្លែងស្រាវជ្រាវ និងអភិវឌ្ឍន៍ បានធ្វើឲ្យក្រុមអ្នកជំនាញព្រមានថា ការធ្វើតេស្តអាវុធថ្មីមួយទៀត ប្រហែលជានឹងកើតមានឡើង។ នេះបើយោងតាមគេហទំព័រសារព័ត៌មាន Sputnik បានចុះផ្សាយនៅថ្ងៃច័ន្ទ ទី០២ ខែតុលា ឆ្នាំ២០១៧។ កូរ៉េខាងជើង នឹងប្រារព្ធពិធីគម្រប់ខួបលើកទី៧២ នៃការបង្កើតគណបក្សពលករកូរ៉េ ដែលកំពុងកាន់អំណាច (WPK) នៅថ្ងៃទី១០ ខែតុលា ខាងមុខនេះ ដោយបាញ់សាកល្បងអាវុធសេរីទំនើប ដែលទើបស្រាវជ្រាវ និងអភិវឌ្ឍន៍នាពេលថ្មីៗនេះ។
យោងតាមប្រភពមកពីលំនៅឋានរបស់ប្រធានាធិបតីកូរ៉េខាងត្បូង Cheong Wa Dae (Blue House) បានឲ្យដឹងថា កាលបរិច្ឆេទនេះ អាចផ្តល់ឱកាសដល់មីស៊ីលផ្លោង និងអ្នកផលិតអាវុធនុយក្លេអ៊ែររបស់កូរ៉េខាងជើង ដើម្បីសាកល្បងការបាញ់មីស៊ីលឆ្លងទ្វីបជាបន្តបន្ទាប់ ដែលជាគោលដៅចម្បងរបស់ក្រុងព្យុងយ៉ាង។
គួរបញ្ជាក់ផងដែរថា នៅថ្ងៃទី ០៤ ខែតុលា គឺជាថ្ងៃដ៏សំខាន់មួយទៀត នៅលើប្រតិទិនកូរ៉េខាងជើង និងកូរ៉េខាងត្បូង ដែលបានកត់សម្គាល់ថា ជាខួបលើកទី១០ នៃជំនួបកំពូលអន្តរកូរ៉េលើកទី០២ ដែលប្រមុខរដ្ឋទាំងពីរ បានអង្គុយចុះសម្រាប់ការពិភាក្សាជាផ្លូវការ៕
