ប្រទេសថៃ: ដោយយោងទៅតាមសារព័ត៌មានក្នុងស្រុងដ៏ធំមួយរបស់ប្រទេសថៃ Bangkokpost បានធ្វើការចុះផ្សាយថា មានហាងទំនិញជាច្រើននៅប្រទេសថៃនឹងចាប់ផ្ដើមបញ្ចុះតម្លៃលើមុខទំនិញរបស់ខ្លួន ចាប់ពីថ្ងៃទី ១១ ខែវិច្ឆិកានេះ រហូតដល់ថ្ងៃ ទី៣ ខែធ្នូខាងមុខ។
យ៉ាងណាមិញ ទំនិញមួយចំនួនបូករួមទាំងសេវាកម្ម មានដូចជា គ្រឿងស្រវឹង ថ្នាំជក់ បន្ទប់សណ្ឋាគារ សំបុត្រយន្តហោះ ឡាន ម៉ូតូ ទូក និង ប្រេងឥន្ធនៈ គឺមិនត្រូវបានរាប់បញ្ចូលនោះទេក្នុងមុខទំនិញ ឬ សេវាកម្មបញ្ចុះតម្លៃនោះឡើយ។
លោក Nuttaporn Jatusripitak ជាទីប្រឹក្សាការិយាល័យរបស់នាយករដ្ឋមន្ត្រីបាននិយាយថា យុទ្ធនាការនេះនឹងអាចធ្វើអោយប្រជាជនសម្រុកទិញទំនិញ និងចំណាយប្រាក់រហូតទៅដល់ ១៤៩០៤បាត ឬស្មើនឹង ៤៥០ ដុល្លារក្នុងម្នាក់ ។
ក្រសួងសេដ្ឋកិច្ចរបស់ថៃបានប៉ាន់ប្រមាណថានឹងបាត់បង់ចំណូលសរុបជាង ៦០លានដុល្លារពីការប្រមូលពន្ធ ប៉ុន្តែហាងទំនិញនិងកន្លែងលក់ដូរទាំងអស់ ប្រហែលជាអាចនឹងទទួលបានចំណូលសរុបប្រមាណជាជាង ៣០០លានដុល្លាររួមបញ្ចូលគ្នា។
"យើងស្វាគមន៍ចំពោះគម្រោងរបស់រដ្ឋាភិបាលក្នុងការជំរុញឲ្យអតិថិជនចំណាយបន្ថែមទៀត ដែលធ្វើអោយពួកគេមានអារម្មណ៍ល្អ និងអាចជួយជំរុញសេដ្ឋកិច្ចទាំងមូលផងដែរ។ កម្មវិធីនេះមិនត្រឹមតែផ្ដល់ផលប្រយោជន៍ដល់អ្នកលក់និងអ្នកទិញប៉ុណ្ណោះទេ សហគ្រាសធំៗក៏ទទួលបានផលប្រយោជន៍ពីវាផងដែរ។"
ទោះជាយ៉ាងណាក៏ដោយ យុទ្ធនាការនេះត្រូវបានកំណត់ត្រឹមរយៈពេលខ្លីប៉ុណ្ណោះដើម្បីជៀសវាងផលប៉ះពាល់អវិជ្ជមានដល់សេដ្ឋកិច្ចជាតិ ដែលគ្រោងនឹងបង្កើន ០,០៥ ភាគរយនៅក្នុងឆ្នាំនេះ៕
Source: Bangkokpost
