Sponsor
អាម៉ាប៉ាប៉ាញ៉ូស

ភ្នំពេញៈ សាប៊ូដុសខ្លួន និងផលិតផលសម្អាតកាយប្រមាណជិត១០០០កេស ត្រូវបាន​មន្រ្តីអន្តរក្រសួង ដឹកនាំដោយព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញលោក ស្រី ម៉ាកនី ចុះត្រួតពិនិត្យនៅទីតាំងផ្ទះមួយកន្លែងនៅភូមិទ្រា សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ សង្ស័យផលិតផលក្លែងក្លាយ និងក្លែងម៉ាកយីហោ។

លោក ឃ្លាំង សាម៉េត ប្រធានការិយាល័យនិយ័តកម្ម នាយកដ្ឋានឱសថនៃក្រសួងសុខាភិបាលបានឲ្យដឹងថា ការចុះត្រួតពិនិត្យនេះ បន្ទាប់ពីគណៈកម្មការអន្តរក្រសួងមានការសង្ស័យជាផលិតផលក្លែងក្លាយ ប៉ុន្តែមិនទាន់ប្រាកដថា ក្លែងក្លាយឬយ៉ាងណាទេ តែសម្រាប់ស្លាកយីហោ គឺមានក្លែងបន្លំ។

លោក​បន្តថា ប្រសិនបើគណៈកម្មការធ្វើការពិនិត្យរួចហើយ ឃើញថា ផលិតផលនេះ ក្លែងក្លាយខាងក្រសួង នឹងធ្វើការផ្សព្វផ្សាយដល់បងប្អូនប្រជាពលរដ្ឋ ដើម្បីបញ្ជាក់ថា ផលិតផលនេះ ប្រើប្រាស់នឹងធ្វើឲ្យមានផលប៉ះពាល់សុខភាពខាងក្រៅ និងមានបញ្ហាស្បែករបស់ពួកគេជាដើម។

ថ្លែងនៅក្នុងកិច្ចប្រតិបត្តិការនោះដែរ លោកវរសេនីយ៍ត្រី ម៉ាត់ យូសុះ នាយការិយាល័យប្រឆាំងបទល្មើសកម្មសិទ្ធិបញ្ញា បានឲ្យដឹងថា ផលិតផលដែលសង្ស័យថា ក្លែងក្លាយនេះ គឺមានចំនួន៩ម៉ាក និង៧៦៧កេះ ស្មើនឹង១០តោន។ ប៉ុន្តែទោះជាយ៉ាងណាក៏ដោយលោកបានលើកឡើងថា ផលិតផលនេះខាងគណៈកម្មការពុំទាន់ធ្វើការរឹបអូសនោះទេ ដោយរក្សាទុកនៅកន្លែងទីតាំងដដែល ដោយរងចាំសេចក្តីសម្រេចរបស់តុលាការ និងមន្រ្តីជំនាញដែលយកទៅធ្វើការត្រួតពិនិត្យ។

ដោយឡែកសម្រាប់ម្ចាស់ផលិតផល និងម្ចាស់ទីតាំងឈ្មោះ តៅ ប្រសិទ្ធ ភេទប្រុស អាយុ៣៨ឆ្នាំ ហើយនាពេលនេះត្រូវបានគេចខ្លួន មន្រ្តីនឹងធ្វើការកោះអញ្ជើញគាត់ឲ្យមកដោះស្រាយទៅតាមនីតិវិធីច្បាប់។ យ៉ាងណាក៏ដោយក្រសួងមហាផ្ទៃនឹងមិនលើកលែងឲ្យម្ចាស់ផលិតផលរួចខ្លួននោះឡើយ ក្រោយពីពិនិត្យឃើញថា ផលិតផលនេះពិតជាក្លែងក្លាយ និងបន្លំម៉ាកយីហោមែននោះ៕

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post
Sponsor