ថ្មីៗនេះ តំណាងក្រសួងមហាផ្ទៃបានដាក់បញ្ជីឈ្មោះសមាជិកគណៈកម្មាធិការនាយក និងមន្ត្រីជាន់ខ្ពស់១១៧រូប ជូនតុលាការកំពូល ដើម្បីហាមឃាត់មិនឱ្យធ្វើនយោបាយរយៈពេល៥ឆ្នាំ។ ថ្ងៃនេះ ក្រុមមេធាវីតំណាងក្រសួងមហាផ្ទៃមានគម្រោងដាក់បញ្ជីឈ្មោះថ្នាក់ដឹកនាំគណបក្សប្រឆាំងម្នាក់ទៀតជូនតុលាការកំពូល សុំផ្អាកសកម្មភាពនយោបាយ៥ឆ្នាំ ដូចនេះបញ្ជីឈ្មោះនឹងកើនដល់១១៨រូប។
ប៉ុន្តែគេមិនទាន់ដឹងពីអត្តសញ្ញាណថ្នាក់ដឹកនាំគណបក្សសង្គ្រោះជាតិមួយរូបនេះនៅឡើយទេ។ រង់ចាំមើលតើថ្នាក់ដឹកនាំគណបក្សសង្គ្រោះជាតិមួយរូបនេះ ជានរណាគេ? ប្រហែលជាលោក សម រង្ស៊ី?
នៅស្អែកជាថ្ងៃដែលតុលាការកំពូលបើកសវនាការលើបណ្តឹងសុំរំលាយគណបក្សសង្គ្រោះជាតិ ក្រុមមេធាវីតំណាងក្រសួងមហាផ្ទៃជឿជាក់ថា គណបក្សសង្គ្រោះជាតិពិតជារលាយមួយរយភាគរយ ដោយយោងតាមភស្តុតាងយ៉ាងច្រើនសន្ធឹកសន្ធប់ និងរឹងមាំដែលផ្តល់ជូនតុលាការកំពូល។
