គ្រោះរញ្ជួយដីកម្រិត ៧.៣វ៉ិចទ័រ ដ៏ខ្លាំងក្លាមួយ បានវាយប្រហារតំបន់ព្រំដែនរវាងអ៊ីរ៉ាក់-អ៊ីរ៉ង់ ដែលបានសម្លាប់មនុស្សរហូតដល់ ១៤១នាក់ និងរងរបួសយ៉ាងធ្ងន់ធ្ងរ ចំនួន៨៦៦នាក់ កាលពីម្សិលមិញ។ នេះបើយោងតាមគេហទំព័រសារព័ត៌មាន រុស្ស៊ី (RT) បានចុះផ្សាយនាព្រឹកថ្ងៃច័ន្ទ ទី១៣ ខែវិច្ឆិកា ឆ្នាំ២០១៧។
ទីភ្នាក់ងារឧតុនិយមអ៊ីរ៉ង់ បាននិយាយថា ចំណុចរញ្ជួយផែនដីខាងលើ បានកើតឡើងនៅចម្ងាយប្រមាណ១០៣គីឡូម៉ែត្រ ភាគអាគ្នេយ៍ទីក្រុង Sulaymaniyah នៃប្រទេសអ៊ីរ៉ាក់ និងជះឥទ្ធិពលយ៉ាងខ្លាំង ដល់ខេត្តមួយចំនួនទៀត របស់អ៊ីរ៉ង់ ដែលនៅជាប់ព្រំដែនជាមួយអ៊ីរ៉ាក់។
គួរបញ្ជាក់ផងដែរថា ក្រុមភ្នាក់ងារជួយសង្គ្រោះអ៊ីរ៉ង់ ក៏បានប្រញាប់ប្រញាល់ទៅតំបន់រងការវាយប្រហារ ដោយមានឧទ្ធម្ភាគចក្រ កំពុងដឹកជញ្ជូនបរិក្ខារ ដើម្បីទុកជួយប្រជាពលរដ្ឋ ដែលរងគ្រោះ ដោយសារគ្រោះមហន្តរាយនេះ៕