ភ្នំពេញៈ ក្រុមចោរប្លន់ប្រដាប់អាវុធ២នាក់ ត្រូវប៉ូលិសក្រុងភ្នំពេញ ចាប់ខ្លួន និងបង្ហាញមុខជាសាធារណៈក្នុងសន្និសីទកាសែតនាព្រឹកថ្ងៃចន្ទ ទី១៣ វិចិ្ឆកានេះ នៅការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញ។
ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលក្រុងភ្នំពេញ លោក អេង សោភា បាននិយាយថា ក្រោយសហការជាមួយប៉ូលិស៤ខណ្ឌ មានខណ្ឌ៧មករា ពោធិ៍សែនជ័យសែនសុខ និងខណ្ឌទួលគោកហើយនោះ សមត្ថកិច្ចក៏បានចាប់ខ្លួនជនសង្ស័យ២នាក់ ក្នុងនោះក៏មានអាវុធខ្លី និងវត្ថុតាងមួយចំនួនផងដែរ។
យោងតាមរបាយការណ៍របស់ប៉ូលិស បានបង្ហាញថា ក្នុងរយៈពេល១០ខែ ឆ្នាំ២០១៧ សភាពការប្លន់ប្រដាប់អាវុធយកម៉ូតូនៅរាជធានីភ្នំពេញ មានការថយចុះ គួរឲ្យកត់សម្កាល់ បើធៀបនឹងឆ្នាំ២០១៦ ដោយឡែកដើមខែវិច្ឆិកា ឆ្នាំ២០១៧ បានលេចឡើងនូវករណីប្លន់ប្រដាប់អាវុធបាញ់យកម៉ូតូចំនួន២ករណីផ្ទួនៗ។
ករណីទី១៖ បាញ់ប្លន់ជនរងគ្រោះបណ្ដាលឲ្យរងរបួស យកម៉ូតូ១គ្រឿងម៉ាក ហុងដាស្កូពី ពណ៌ស សេរី២០១៨ ពាក់ស្លាកលេខភ្នំពេញ 1GP-0078 កាលពីថ្ងៃទី៧ ខែវិច្ឆិកា ឆ្នាំ២០១៧ វេលាម៉ោងប្រហែល៩យប់ នៅចំណុចមុខផ្ទះលេខ៩៥E0 ផ្លូវលេខ១៤៩ ក្រុម១៥ ភូមិ៣ សង្កាត់វាលវង់ ខណ្ឌ៧មករា រាជធានីភ្នំពេញ។
ករណីទី២៖ បាញ់ប្លន់យកម៉ូតូ១គ្រឿងម៉ាកហុងដា សេ១២៥ សេរី២០១៧ ពណ៌ខ្មៅ ពាក់ស្លាកលេខ ភ្នំពេញ 1FT-3968 កាលពីវេលាម៉ោង៦និង៣០នាទីថ្ងៃទី១០ ខែវិច្ឆិកា ឆ្នាំ២០១៧ នៅចំណុចមុខផ្ទះលេខ៧៨ ផ្លូវ២០០៤ សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
ក្រោយពីមានសភាពការខាងលើនេះ ក្រោមការដឹកនាំបញ្ជាផ្ទាល់ពីលោកអភិបាលនៃគណៈអភិបាលរាជធានីភ្នំពេញ ដែលជាប្រធានគណៈបញ្ជាការឯកភាពរាជធានីភ្នំពេញ នាយឧត្តមសេនីយ៍ អគ្គស្នងការរង និងជាស្នងការនគរបាលរាជធានីភ្នំពេញ លោកស្នងការរងទទួលផែននគរបាលព្រហ្មទណ្ឌ បានបញ្ជាឲ្យការិយាល័យជំនាញ និងអធិការដ្ឋាន ដែលពាក់ព័ន្ធ ចំណុះឲ្យស្នងការដ្ឋាននគរបាលរាជធានីភ្នំពេញធ្វើការស្រាវជ្រាវ បង្កាបក្រុមចោរប្លន់អាវុធទាំងនោះ។
ជាក់ស្ដែងការិយាល័យនគរបាលព្រហ្មទណ្ឌកម្រិតធ្ងន់សហការជាមួយអធិការដ្ឋាននគរបាលខណ្ឌសែនសុខ អធិការដ្ឋាននគរបាលខណ្ឌ៧មករា ទួលគោក និងពោធិ៍សែនជ័យ ក្រោមការសម្របសម្រួលពីលោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានធ្វើការបង្ក្រាបរយៈពេល៣ថ្ងៃ ទើបឈានដល់ការឃាត់ខ្លួនក្រុមចោរប្លន់ប្រដាប់អាវុធបានចំនួន២នាក់ កាលពីថ្ងៃទី១១ ខែវិច្ឆិកា ឆ្នាំ២០១៧ នៅចំណុចផ្ទះជួលគ្មានលេខ ផ្លូវបេតុង ភូមិ.សង្កាត់អូរបែកក្អម ខណ្ឌសែនសុខ រាជធានីភ្នំពេញ។
ជនសង្ស័យទី១ ឈ្មោះ ម៉ែន រ័ត្ន ហៅរ័ត្ន ភេទប្រុស អាយុ៣៤ឆ្នាំជនជាតិខ្មែរ ទីលំផ្ទះជួលគ្មានលេខ ផ្លូវបេតុង ក្រុម៦ សង្កាត់អូរបែកក្អម ខណ្ឌសែនសុខ។ ទី២ ឈ្មោះ ឥន ចាន់ដារ៉ូត ហៅ រ៉ូត ភេទប្រុស អាយុ២៤ឆ្នាំ ស្នាក់នៅផ្ទះជួលគ្មានលេខ ផ្លូវទេពផន សង្កាត់ទឹកល្អក់ទី៣ ខណ្ឌទួលគោក ។
ក្នុងនោះសមត្ថកិច្ច បានឃាត់ខ្លួនជនសង្ស័យប្រើប្រាស់គ្រឿងប្រុសស្រីចំនួន៥នាក់ ទី១ ឈ្មោះ ឃីន ដឺលុច្យ ភេទប្រុស អាយុ៤ឆ្នាំ ជនជាតិខ្មែរ ស្នាក់នៅផ្ទះជួលគ្មានលេខ ផ្លូវបេតុង សង្កាត់អូរបែកក្អម ខណ្ឌសែនសុខ មុខរបរធ្វើជ្រូកខ្វៃ។ ទី២ ឈ្មោះ ប៊ុត សិលា ភេទប្រុស អាយុ២៤ឆ្នាំ ស្នាក់នៅផ្ទះជួលគ្មានលេខ ភូមិត្រពាំងឈូក សង្កាត់ទឹកថ្លា ខណ្ឌសែនសុខ បុគ្គលិកផ្នែកម្ហូប នៅព្រលានយន្តហោះ។ ទី៣ឈ្មោះ ហេង សាវុធ ភេទប្រុស អាយុ២៧ឆ្នាំ ជនជាតិខ្មែរ ស្នាក់នៅផ្ទះលេខ២៨ ផ្លូវលេខ៥៩០ សង្កាត់បឹងកក់ទី២ ខណ្ឌទួលគោក មុខរបរ មិនពិតប្រាកដ។ ទី៤ឈ្មោះ ហ៊ីម ពៅ ភេទស្រី អាយុ២១ឆ្នាំ ជនជាតិខ្មែរ ស្នាក់នៅផ្ទះគ្មានលេខ ភូមិ.សង្កាត់អូរបែកក្អម ខណ្ឌសែនសុខ មុខរបរនៅផ្ទះ ។ ទី៥ ឈ្មោះ ហ៊ីម រ៉ែ ភេទស្រី អាយុ១៩ឆ្នាំ ជនជាតិខ្មែរ ស្នាក់នៅផ្ទះគ្មានលេខ ភូមិ.សង្កាត់ អូរបែកក្អម ខណ្ឌសែនសុខ មុខរបរនៅផ្ទះ។
ក្រោយពីបង្ក្រាបជនសង្ស័យខាងលើ សមត្ថកិច្ចដកហូតវត្ថុតាងរួមមាន ៖ កាំភ្លើង២ដើម ម៉ូតូ៤គ្រឿង ទី១ ហុងដា សេ១២៥ ពណ៌ខ្មៅ ពាក់ស្លាកលេខ ភ្នំពេញ 1GH-0185 (មធ្យោបាយធ្វើសកម្មភាព) ទី២ ម៉ាកហ្សូម័រអ៊ីច ពណ៌ក្រហមលាយស ពាក់ស្លាក់លេខ ភ្នំពេញ 1GP-9136 ទី៣ម៉ាកវីវ៉ា ពណ៌ខ្មៅ ពាក់ស្លាកលេខ 10-4175 ទី៤ ម៉ាកវីវ៉ា ពណ៌ខ្មៅ ពាក់ស្លាកលេខ ភ្នំពេញ 1P-1862 និងវត្ថុតាងមួយចំនួនទៀត៕
