ភ្នំពេញៈ នារីរូបស្រស់ម្នាក់ បបួលមិត្តភ័ក្ត២នាក់ទៀត ទៅលែងមជ្ឈមណ្ឌលកម្សាន្តROCK ដើម្បីស្ដាប់ភ្លេងរាំលែង នឹងប្រើប្រាស់សារធាតុញៀន រហូតបាត់បង់ស្មារតី ត្រូវមិត្តភក្ដិដឹកទៅសង្គ្រោះនៅមន្ទីរពេទ្យ ស្រាប់តែជួបអកុសលគាំងបេះដូង ស្លាប់តាមផ្លូវ កាលពីវេលាម៉ោង៥៖៣០នាទីព្រឹក ថ្ងៃទី១ ខែវិច្ឆិកា ឆ្នាំ២០១៧។
សមត្ថកិច្ចបានឲ្យដឹងថា សាកសពនារីរងគ្រោះត្រូវបានគេស្គាល់ថាមានឈ្មោះ បូ សុភី អាយុ២៥ឆ្នាំ មុខរបរ បុគ្គលិកខារ៉ាអូខេ នៅខេត្តត្បូងឃ្មុំ បច្ចុប្បន្នស្នាក់នៅភូមិត្រពាំងខ្លុង ស្រុកពញ្ញាក្រែក ខេត្តត្បូងឃ្មុំ មានស្រុកកំណើតនៅភូមិកោះទាវ ឃុំសំពៅលូន ស្រុកកោះធំ ខេត្តកណ្ដាល។ ចំណែកឯមិត្តភក្ដិនារីរងគ្រោះ២នាក់ទៀត សុំមិនបញ្ចេញឈ្មោះ។
តាមប្រភពព័ត៌មានពីនារីម្នាក់ សុំមិនបញ្ចេញឈ្មោះជាមិត្តភក្តិ របស់សាកសពជនរងគ្រោះ បានឲ្យដឹងថា នៅមុនពេលកើតហេតុខ្លួន នឹងមិត្តភក្ដិបានបបួលគ្នាមកពីខេត្តត្បូងឃ្មុំ ទៅលែងភ្នំពេញ ដើម្បីចូលរួមពិធីបុណ្យអុំទូក។ លុះមកដល់ភ្នំពេញខ្លួន នឹងមិត្តភក្ដិ ព្រមទាំងសាកសពបានចែកផ្លូវគ្នា ទៅផ្ទះបងប្អូនសាច់ញាត្តិរៀងៗខ្លួន រហូតដល់ថ្ងៃដដែលខ្លួន នឹងជនរងគ្រោះព្រមទាំងមិត្តភក្ដិម្នាក់ទៀត តេទូរស័ព្ទទាក់ទងគ្នាទៅលែងមជ្ឈមណ្ឌលកម្សាន្តរ៉ក ដែលស្ថិតនៅតាមបណ្ដោយផ្លូវព្រះមន្នីវង្ស ក្នុងខណ្ឌចំកាមន។ បន្ទាប់មកនៅវេលាម៉ោងប្រហែល១២កណ្ដាលអាធ្រាត ឈានចូលថ្ងៃទី១ខែវិច្ឆិកា ឆ្នាំ២០១៧ ខ្លួននឹងមិត្តភក្ដិព្រមទាំងសាកសពបានចូលទៅលែងក្នុងមជ្ឈមណ្ឌលកម្សាន្តរ៉ក ដោយហៅស្រាបៀរ និងទឹកក្រូចកូកាកូឡា ហូបនឹងប្រើប្រាស់សារធាតុញៀន ដើម្បីសប្បាយ ប៉ុន្តែលើសកំណត់ រហូតដល់ជនរងគ្រោះមានអាការៈមិនស្រួលខ្លួន ក៏ហៅសន្តិសុខមកជួយធ្វើសសៃ ខណៈនោះជនរងគ្រោះបានដឹងខ្លួនបន្តិច ក៏ហៅរថយន្តតាក់ស៊ីដឹកយកទៅផ្ទះសំណាក់យីហោ វល្លិ៍មាស ដែលស្ថិតនៅចម្ងាយប្រហែលជា៥០០ម៉ែត្រ អស់រយៈពេលជាង១៥នាទី ប៉ុន្តែមើលអាការៈជនរងគ្រោះមិនស្រួល ក៏ហៅតុៗដឹកទៅព្យាបាលនៅមន្ទីរពេទ្យកាលម៉ែត្រ តែអកុសលជនរងគ្រោះ បានស្លាប់បាត់បង់ជីវិតទៅហើយ។
បច្ចុប្បន្ន សាកសពជនរងគ្រោះ ត្រូវបានកម្លាំងនគរបាលជំនាញ ប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី នៅឯស្រុកកំណើត៕
ក្រោយពីកើតហេតុគេឃើញកម្លាំងនគរបាលមូលដ្ឋាន បានសហការជាមួយកម្លាំងនគរបាលជំនាញ នៃស្នងការក្រុងចុះមកធ្វើកោសល្យវិច្ច័យ។ តាមប្រភពព័ត៌មានពីកម្លាំងនគរបាលជំនាញម្នាក់ សុំមិនបញ្ចេញឈ្មោះ បានឲ្យដឹងថា សាកសពជនរងគ្រោះពិតជាស្លាប់ដោយសារគាំងបេះដូង ពិតប្រាកដមែន។
