ភ្នំពេញៈ ប្រភពព័ត៌មានច្បាស់ការពីសាលាដំបូងរាជធានីភ្នំពេញ បានឲ្យដឹងនៅថ្ងៃទី៥ ធ្នូ ឆ្នាំ២០១៧នេះថា ជនជាប់ចោទឈ្មោះ ប្លង់ ពិសិដ្ឋ អនុប្រធាននាយកដ្ឋានក្រសួងសង្គមកិច្ច ដែលត្រូវបានជាប់ឃុំឃាំង ក្នុងបទហិង្សាដោយចេតនាមានស្ថានទម្ងន់ទោស ពាក់ព័ន្ធការវាយបោចសក់ស្ត្រីម្ចាស់បំណុលម្នាក់ ស្ទើស្លាប់ស្ទើររស់នោះ ត្រូវបានចៅក្រមតុលាការសម្រេចចេញដីកាដោះលែងឲ្យមានសេរីភាពវិញហើយ ក្រោមរូបភាពជនជាប់ចោទដាក់ប្រាក់តម្កល់ធានាខ្លួនសុំនៅក្រៅឃុំចំនួន២០០០ដុល្លារប៉ុណ្ណោះ។
សេចក្ដីរាយការណ៍ បានឲ្យដឹងថា កាលពីចុងសប្ដាហ៍មុន លោកចៅក្រម ឌុច សុខសារិន ចៅក្រមស៊ើបសួរក្នុងសំណុំរឿងក្ដីហិង្សានេះ បានចេញដីកាសម្រេចដោះលែងឲ្យជនដៃដល់ឈ្មោះ ប្លង ពិសិដ្ឋ ឲ្យនៅក្រៅឃុំ ដោយសម្អាងថា ជនជាប់ចោទបានដាក់ប្រាក់តម្កល់ធានាខ្លួននៅតុលាការចំនួន២០០០ដុល្លារ ដើម្បីសុំនៅក្រៅឃុំ ជនជាប់ចោទមានមេធាវីធានា ជនជាប់ចោទមានលំនៅស្ថានច្បាស់លាស់ និងមានមុខរបរពិតប្រាកដ។
ភាពមិនប្រក្រតីនៅក្នុងការឲ្យជនជាប់ចោទនៅក្រៅឃុំនេះ ស្ថិតនៅត្រង់ថា ចៅក្រមតុលាការដែលទទួលបន្ទុកស៊ើបសួរមិនទាន់បានកោះហៅជនរងគ្រោះមកសាកសួរនៅឡើយ អំពីរឿងហេតុ ដែលឈានទៅដល់មានអំពើហិង្សាយ៉ាងកម្រោលនោះ ស្រាប់តែចៅក្រមសម្រេចដោះលែងឲ្យជនដៃដល់មានសេរីភាពវិញយ៉ាងរំភើយ វាខុសពីគោលការណ៍តម្លាភាពក្នុងប្រព័ន្ធយុត្តិធ័ម ឬវាជាទម្លាប់នៃការអនុវត្តបែបនិទណ្ឌភាពនៅក្នុងប្រព័ន្ធយុត្តិធ៌មកម្ពុជាយើង?
គ្រួសាររបស់ជនជាប់ចោទបានសរសេរនៅក្នុងហ្វេសបុកពាក់ព័ន្ធករណីនេះថា គេមានប្រាក់ មានអំណាច គ្មានការចរចា ឬសុំទោសជនរងគ្រោះឡើយ គេសុខចិត្តបោះនុយឲ្យក្រពើស៊ី តែមិនសុំទោសជនរងគ្រោះដាច់ខាត ។ លុះប៉ុន្មានថ្ងៃក្រោយមកចៅក្រមតុលាការបានដោះលែងជនជាប់ចោទដូចគេនិយាយមែន។ នេះសបញ្ជាក់ឲ្យឃើញថា ការប្រព្រឹត្តបទល្មើសរបស់គេអាចលុបលាងដោយទឹកប្រាក់នៅក្នុងប្រព័ន្ធយុត្តិធម៌ ដោយមិនបានគិតពីសុវត្ថិភាពរបស់ជនរងគ្រោះឡើយ ។
ទោះបីយ៉ាងណា ជនរងគ្រោះជានារីភេទទន់ខ្សោយនៅក្នុងរឿងក្ដីនេះ សូមស្នើដល់លោករដ្ឋមន្ត្រីក្រសួងយុត្តិធម៌ ពិសេសេសម្ដេចគតិព្រឹទ្ធបណ្ឌិត ប៊ុន រ៉ានីហ៊ុន សែន មេត្តាជួយផ្ដល់នូវភាពយុត្តិធ័មក្នុងរឿងក្ដីនេះផង ព្រោះប្រព័ន្ធតុលាការកម្ពុជា ធ្វើឲ្យប្រជាជនអស់ទំនុកចិត្ត ពិសេស ធ្វើឲ្យជនរងគ្រោះឈឺចាប់ និងរងាខ្លាំងណាស់នាពេលបច្ចុប្បន្ននេះ។
សូមបញ្ជាក់ថា លោក ប្លង់ ពិសិដ្ឋ កាលពីល្ងាចថ្ងៃទី ៨ តុលា ឆ្នាំ២០១៧ ត្រូវបានលោកចៅក្រម ឌុច សុខសារិន សម្រេចឃុំខ្លួនជាបណ្ដោះអាសន្ននៅពន្ធនាគារភ្នំពេញ ក្រោមការចោទប្រកាន់ពីបទហិង្សារយចេតនាមានស្ថានទម្ងន់ទោស តាមមាត្រា២១៨នៃក្រមព្រហ្មទណ្ឌ ។
ជនជាប់ចោទត្រូវបានសមត្ថកិច្ចនគរបាលព្រហ្មទណ្ឌរាជធានីភ្នំពេញចាប់ខ្លួនកាលល្ងាចថ្ងៃទី ៦ តុលា ឆ្នាំ២០១៧ និងបានបញ្ជូនមកអយ្យការអមសាលាដំបូងរាជធានីភ្នំពេញ ពាក់ព័ន្ធករណីប្រើហិង្សា និងប៉ុនប៉ងសម្លាប់ស្ត្រីម្នាក់បំបិទមាត់ ដោយសារតែការជំពាក់បំណុលជនរងគ្រោះវ័ណ្ឌកតែមិនព្រមសងសោះ។
មន្ត្រីនគរបាល បានឲ្យដឹងថា ជនដៃដល់ ឈ្មោះ ប្លុង ពិសិដ្ឋ ភេទប្រុស អាយុ៣៤ឆ្នាំ មានមុខរបរជាអនុប្រធាននាយកដ្ឋានយុវនីតិសម្បទា នៃក្រសួងសង្គមកិច្ច អតីតយុទ្ធជន និងយុវនីតិសម្បទា ស្នាក់នៅផ្ទះលេខ ១០និងលេខ ១២ បុរីពិភពថ្មិសែនសុខ ផ្លូវលេខ១ សង្កាត់ភ្នំពេញថ្មី ខណ្ឌសែនសុខ ។ ចំណែកបក្ខពួកជនដៃដល់២នាក់ទៀត បានរត់គេចខ្លួនអស់ហើយក្រោយពីប្រព្រឹត្តអំពើព្រៃផ្សៃលើជនរងគ្រោះជានារីភេទ ដោយភ្ជាប់ជាមួយនូវភស្តុតាងជាឃ្លីបវីដេអូ ស្ដីពីអំពើហិង្សាយ៉ាងកម្រោលរបស់ក្រុមបុរស៣នាក់មកលើនារីជាជនរងគ្រោះតែម្នាក់។
តាមរយៈវីដេអូរឃ្លីបរយៈពេល១នាទីនិង៤១វិនាទី នៅកន្លែងកើតហេតុបានបង្ហាញនូវសកម្មភាពរបស់ក្រុមជនដៃដល់វាយតប់បោចសក់ទាត់ធាក់បោកជនរងគ្រោះផ្ទប់និងឥដ្ឋការ៉ូ ច្របាច់កយ៉ាងព្រៃផ្សៃគ្មានក្ដីមេត្តាអ្វីបន្តិចសោះ កុំតែបានម្ចាស់ហាងនិងសន្តិសុខបុរីមកជួយទាន់ពេលវេលា កុំអីស្ត្រីរងគ្រោះអាចនឹងមានគ្រោះថ្នាក់ដល់ជីវិតទៅហើយ ។
អំពើព្រៃផ្សៃរបស់ក្រុមជនដៃដល់ធ្វើមកលើជនរងគ្រោះបានកើតឡើងតាំងពីថ្ងៃទី ៦កញ្ញា ឆ្នាំ២០១៧មកម្ល៉េះនៅក្នងភោជនីយដ្ឋានមួយទល់មុខបុរីអង្គរភ្នំពេញ ក្នុងសង្កាត់ភ្នំពេញថ្មី ខណ្ឌសែនសុខ ហើយជនរងគ្រោះបានដាក់ពាក្យបណ្ដឹងទៅសមត្ថកិច្ចនគរបាលនិងព្រះរាជអាជ្ញាអមតុលាការ ទើបព្រះរាជអាជ្ញាបញ្ជាអោយសមត្ថកិច្ចចាប់ខ្លួនជនដៃដល់អនុវត្តតាមច្បាប់ ។
សមត្ថកិច្ច បានឲ្យដឹងថា ជនរងគ្រោះឈ្មោះ ស រ ភេទស្រី អាយុ២៨ឆ្នាំ មានមុខរបរជាអ្នកលក់ដូរ រស់នៅក្នុងសង្កាត់ភ្នំពេញថ្មី ខណ្ឌសែនសុខ ។
នៅថ្ងៃកើតហេតុជនដៃដល់ឈ្មោះ ប្លុង ពិសិដ្ឋ ដែលជាអ្នកជំពាក់ប្រាក់ជនរងគ្រោះបានណាត់ជនរងគ្រោះអោយចេញមកក្រៅដើម្បីនិយាយគ្នាដោយឈ្មោះ ប្លុង ពិសិដ្ឋ បើករថយន្តម៉ាកម៉ាស្ដាព័ណស ស្លាកលេខភ្នំពេញ 2AB - 4800 ទៅដឹកជនរងគ្រោះនៅផ្សារស៊ីឡឹប ហើយបើកទៅសង្កាត់ភ្នំពេញថ្មីដឹកមិត្តភ័ក្រឈ្មោះ គង់ ស្រ៊ីន យកទៅភោជនីយដ្ឋានមួយនៅទល់មុខបុរីអង្គរភ្នំពេញសង្កាត់ភ្នំពេញថ្មី ខណ្ឌសែនសុខ ។ នៅពេលទៅដល់មិនទាន់បាននិយាយគ្នារឿងលុយជំពាក់ទេ ជនរងគ្រោះក៏បានសុំឈ្មោះ ប្លុង ពិសិដ្ឋ មកផ្ទះមួយភ្លែតដោយសារមានធុរៈបន្ទាន់ ។ លុះដល់ម៉ោងប្រម៉ាន ៩និង២០នាទីយប់ទើបជនរងគ្រោះត្រឡប់មកវិញ ក៏ឃើញឈ្មោះ ប្លុង ពិសិដ្ឋ ឈ្មោះ គង់ ស្រ៊ីន និងបក្ខពួកម្នាក់ទៀតឈ្មោះខៀវ នៅអង្គុយចាំដដែល។
ប្រភពព័ត៌មានបានឲ្យដឹងទៀតថា ពេលជនរងគ្រោះត្រឡប់មកវិញមិនទាន់បានអង្គុយចុះផង ស្រាប់តែឈ្មោះ ប្លុង ពិដិដ្ឋ ស្ទុះមកវាយជនរងគ្រោះកណ្ដាលមុខបណ្ដាលអោយដួលខ្ពោក ហើយបន្តវាយបោចសក់ ចាប់បោកផ្ទប់និងតុ បោកផ្ទប់និងឥដ្ឋការ៉ូ ចាប់ច្របាច់កជនរងគ្រោះបំណងសម្លាប់ចោល បណ្ដាលអោយមានការភ្ញាក់ផ្អើលពេញហាង។ ឃើញសកម្មភាពព្រៃផ្សៃដូច្នេះ ម្ចាដ់ហាង និងអ្នករត់តុបានចូលទៅជួយអន្តាគមទើបក្រុមជនដៃដល់រត់គេចខ្លួនពីកន្លែងកើតហេតុបាត់អស់ទៅ។ លុះដល់ថ្ងៃទី ០៧កញ្ញាទើបជនរងគ្រោះទៅដាក់ពាក្យបណ្ដឹងនៅស្នងការដ្ឋាននគរបាលរាជធានីភ្នំពេញដើម្បីអោយជួយរកយុត្តិធ័ម ព្រោះទង្វើរបស់ក្រុមជនដៃដល់មានលក្ខណសាហាវព្រៃផ្សៃ គ្មានចិត្តធ័មមេត្តាអាងខ្លួនជាមន្ត្រីរាជការ មានបុណ្យស័ក្ដធំជំពាក់ប្រាក់គេមិនសងហើយចង់សម្លាប់ម្ចាស់បំណុលបំបិទមាត់ទៀត។
សំណុំរឿងក្ដីនេះក្រោយពីសមត្ថកិច្ចបញ្ជូនជនដៃដល់តុលាការ ព្រះរាជអាជ្ញាបានសម្រេចចោទប្រកាន់ពីបទហឹង្សាដោយចេតនាមានស្ថានទំងន់ទោស ។ បន្ទាប់មកលោកចៅក្រមឌុច សុខសារិន ជាចៅក្រមសើបសួរបានចេញដីកាសម្រេចឃុំខ្លួនជនដៃដល់ជាបណ្ដោះអាសន្ន មិននឹកស្មានថា ការឃុំខ្លួនជនជាប់ចោទមិនបានប៉ុន្មានថ្ងៃផង ចៅក្រមស៊ើបសួរបានសម្រេចដោះលែងជនដៃដល់ស្ងាត់ៗឲ្យមានសេរីភាពវិញបាត់ទៅ ដែលសូម្បីតែជនរងគ្រោះក៏មិនបានដឹងរឿងចៅក្រមតុលាការសម្រេចបែបនេះដែរ ៕
