អ្នកដើរសមុទ្រ (អ្នកនេសាទ-ដឹកជញ្ជូន) ទាំងឡាយ គួរងាកមកចាប់អារម្មណ៍ថា ថ្ងៃទី២៥ ខែធ្នូ ឆ្នាំ២០១៧នេះ ព្យុះតឹមប៊ិន នឹងរសាត់មកដល់លំហសមុទ្រកម្ពុជា ដូច្នេះត្រូវប្រុងប្រយ័ត្នឱ្យបានខ្ជាប់ខ្ជួន។
ព្រឹកថ្ងៃទី២៥ ខែធ្នូនេះ ក្រសួងធនធានទឹក និងឧតុនិយម បានចេញសេចក្តីជូនដំណឹងបន្ថែម ស្តីពីឥទ្ធិពលរបស់ព្យុះទី២៧ ឈ្មោះ តឹម ប៊ិន (TEMBIN) កំពុងមានឥទ្ធិពលមកលើព្រះរាជាណាចក្រកម្ពុជាហើយ ដោយបង្កឱ្យមានខ្យល់បក់បោកខ្លាំង លាយឡំជាមួយនឹងភ្លៀងខ្លាំងនៅលើផ្ទៃសមុទ្រ និងតំបន់ឆ្នេរ ព្រមទាំងធ្វើឱ្យមានភ្លៀងធ្លាក់ពីមធ្យមទៅច្រើន ក្នុងក្របខ័ណ្ឌស្ទើរទូទាំងប្រទេស។
ជាមួយគ្នានេះក្រសួងធនធានទឹក បានអំពាវនាវសូមអ្នកធ្វើដំណើរតាមសមុទ្រ ពិសេសចំពោះបងប្អូនប្រជានេសាទ គួរផ្អាកសកម្មភាព ចាប់ពីល្ងាចថ្ងៃទី ២៥ ខែធ្នូ រហូតដល់ស្ថានភាពអាកាសធាតុ បានល្អប្រសើរឡើងវិញ៕
