កំពង់ចាមៈ រថយន្ត២គ្រឿង ជិះបុកគ្នាពេញទំហឹងដូចក្នុងខ្សែភាពយន្ត រងការខូចខាតខ្ទិចមួយកំណាត់មុខ តែសំណាងអ្នកបើកបរគ្រាន់តែរបួសស្រាលតែប៉ុណ្ណោះ។
ករណីគ្រោះថ្នាក់ចរាចរណ៍នេះ កើតឡើងនាថ្ងៃអាទិត្យ ៧កើត ខែបុស្ស ឆ្នាំរកា ព.ស.២៥៦១ ត្រូវនឹងថ្ងៃទី២៤ ខែធ្នូ ឆ្នាំ២០១៧ វេលាម៉ោង៤ និង១០នាទី នៅលើផ្លូវជាតិលេខ៦១ ចំណុចក្បាលយក្ស ខាងលិចភូមិសំបូរ ឃុំសំបូរ ស្រុកបាធាយ ខេត្តកំពងចាម។
ប្រភពព័ត៌មានបានឲ្យដឹងថា មុនពេលកើតហេតុ គេឃើញរថយន្តទាំង២គ្រឿង ដោយ ១គ្រឿង ម៉ាកហុីយ៉ាន់ដាយ ពណ៌លឿង ពាក់ស្លាកលេខ 2AK-2564 បើកបរដោយឈ្មោះ ឈឿង ផាត ភេទប្រុស អាយុ២៨ឆ្នាំ មានីលំនៅភូមិយាយទៀង ឃុំបល្ល័ង្គ ស្រុកបារាយណ៍ ខេត្តកំពង់ធំ និងមួយគ្រឿងទៀតម៉ាកហ្វតរ៉េនជ័រ ពណ៌ទឹកប្រាក់ ពាក់ស្លាកលេខ ភ្នំពេញ 2R-2897 បើកបរដោយឈ្មោះ មុី សុផល ភេទប្រុស អាយុ៣៩ឆ្នាំ មានទីលំនៅភូមិឃ្លាំងប្រាំ ឃុំវាំងចាស់ ស្រុកឧដុង្គ ខេត្តកំពង់ស្ពឺ បើកបរក្នុងទិសដៅបញ្ច្រាសគ្នា។ លុះមកដល់ចំណុចកើតហេតុ មិនដឹងជាយ៉ាងម៉េច ស្រាប់តែជ្រុលបុកគ្នាយ៉ាងពេញទំហឹង លាន់ដូចរន្ទះ បណ្តាលឲ្យរថយន្តទាំង២គ្រឿងខ្ទិចមួយកំណាត់មុខ តែសំណាងល្អ អ្នកបើកបរគ្រាន់តែរបួសស្រាលតែប៉ុណ្ណោះ។
ក្រោយកើតហេតុបន្តិច គេឃើញវត្តមានសមត្ថកិច្ចចុះទៅវាស់វែង ហើយបានប្រាប់ថា រថយន្តទាំង២គ្រឿងនេះ បើកបរខ្វះការប្រុងប្រយ័ត្ន ទើបបណ្តាលឲ្យជួបគ្រោះថ្នាក់តែម្តង នេះជាភ័ព្វសំណាងដែលគ្រាន់តែខូចខាតរថយន្ត បើមិនដូចច្នោះទេ ច្បាស់ជាមានអ្នកត្រូវរស់នៅកំព្រា និងមេមាយជាក់ជាមិនខាន៕
